2019 ചില തെരഞ്ഞെടുപ്പ് ചർച്ചകൾ ......

     രണ്ടായിരത്തി പത്തൊൻപതു തെരഞ്ഞെടുപ്പ് അവസ്സാനിച്ചു... നരേന്ദ്രമോഡി ഭൂരിപക്ഷവും,, വോട്ടു വിഹിതവും വർദ്ധിപ്പിച്ചു അധികാരത്തിലെത്തി.... രാജ്യത്തെ കേവലം രണ്ടു രാഷ്ട്രീയ ചേരിയാക്കി നിർത്തിയാണ് 2018 നു തോട്ടു മുൻപ് മുതൽ രാഷ്ട്രീയ ഭാരതം മുന്നേറിയത്.. അത് ശ്രീ നരേന്ദ്ര മോദിയെ അനുകൂലിക്കുന്ന രാഷ്ട്രീയം മോദിയെ എതിർക്കുന്ന രാഷ്ട്രീയം എന്നിങ്ങനെ ആയിരുന്നു... 2019 ലെ തെരഞ്ഞെടുപ്പിലേക്കു രാജ്യം എത്തിയപ്പോൾ വിവിധ ശബ്ദങ്ങളായി രാജ്യത്തിന്റെ പല കോണുകളിലായി നിന്ന മോഡി വിരുദ്ധർ ഒന്നായി വന്നു എന്നാണ് കാണാൻ കഴിഞ്ഞത്... ഒരു മനുഷ്യനും അദ്ദേഹത്തെ അനുകൂലിക്കുന്ന രാഷ്ട്രീയ പ്രസ്ഥാനവും ഒരു വശത്തും,, ഇരുപത്തി മൂന്നു രാഷ്ട്രീയ പ്രസ്ഥാനങ്ങളും മറ്റു സംഘടനകളും എതിർവശത്തും ഉണ്ടായിട്ടും എന്തുകൊണ്ട് മോഡി വീണ്ടും അധികാരത്തിലെത്തിയെന്നത് ശരിക്കും ഒരു പഠന വിഷയം തന്നെയാണ്....

     "എന്തുകൊണ്ട് നമ്മൾ തോറ്റു എന്നത് ലളിതമായി പറഞ്ഞാൽ പോരേ" എന്ന സിനിമാ ഡയലോഗിനെ വെളിച്ചമായിക്കണ്ടുതന്നെ നമ്മൾ വിഷയം പഠിക്കണം... കാരണം ലാളിത്യം നിറഞ്ഞ ബഹുഭൂരിപക്ഷം വരുന്ന ജനതയാണ് ഇവിടെയുള്ളത്... അവരാണ് ഈ രാജ്യത്തിന്റെ ഭരണവും ഭാവിയും നിർണ്ണയിക്കുന്നത്... അവർ എത്ര വലിയ കാര്യവും ലളിതമായി മനസ്സിലാക്കാൻ ക്ഷമത ഉള്ളവരാണ്... തങ്ങൾ നിസ്സാരക്കാരാണെന്ന രീതിയിൽ വിഡ്ഢികളാക്കാമെന്ന ധാരണയിൽ ആരെങ്കിലും വിഷയങ്ങളെ വളച്ചൊടിച്ചും,, വിഷം പുരട്ടിയും അവതരിപ്പിച്ചാൽ ലളിതമായിത്തന്നെ അതിന്റെ നിജസ്ഥിതി മനസ്സിലാക്കി ഒന്നിച്ചു നിന്നു പ്രതികരിക്കാനും അറിയുന്നവർ... തങ്ങളുടെ കൈയ്യിലെ പ്രഹര ശേഷിയുള്ള ആയുധം കൊണ്ടു തന്നെ...

     ഒരു രാജ്യം ഒറ്റക്കെട്ടായി ഒരു പ്രസ്ഥാനത്തിന് വോട്ടു ചെയ്യുന്നതിന് പല കാരണങ്ങൾ ഉണ്ടാകാം... എങ്കിലും പ്രധാനമായത്;; വിജയിപ്പിച്ച പാർട്ടിയോടുള്ള ജനങ്ങളുടെ അമിതമായ സ്നേഹവും,, വിശ്വാസ്സവും,, പ്രതീക്ഷയും ആയിരിക്കും കാരണം.... അല്ലെങ്കിൽ തോൽപ്പിച്ച വിഭാഗത്തിനോടുള്ള ജനങ്ങളുടെ വിരോധം അല്ലെങ്കിൽ വിശ്വാസമില്ലായ്മ... ഇതിൽ രണ്ടു വിഷയങ്ങളിലും സൂഷ്മമായി പരിശോധിച്ച് വിവിധ വഴികൾ തുറന്നു പഠിക്കാവുന്നതാണ്.... നമ്മുടെ ഭാരതത്തിൽ എന്തായിരിക്കും സംഭവിച്ചത്..?? സർവ്വ് ജനതയുടെയും സമ്മതം പിടിച്ചു വാങ്ങത്തക്ക വിധമായ ഒരു ഭരണമായിരുന്നോ ശ്രീ മോഡി നടത്തിയിരുന്നത്??

     രണ്ടാം യു പി എ സർക്കാരിന്റെ ഭരണ പരാജയങ്ങൾ മുതലെടുത്ത് മോഡി അധികാരത്തിൽ വന്നു.. അത് അത്ഭുതം കൂറേണ്ട ഒരു ജനാധിപത്യ പ്രതിഭാസമല്ല... പത്തുവർഷം ഭരണത്തിലിരിക്കുന്ന സർവ്വതും അഴിമതി ആരോപണങ്ങളിൽക്കൂടി മാത്രം സഞ്ചരിച്ചിരുന്ന ഒരു സർക്കാരിനെതിരെ ഒരു പ്രസ്ഥാനത്തിലും,, ഭരണാധികാരിയിലും ജനങ്ങൾ വിശ്വാസ്സവും അഭയവും കണ്ടതായിരുന്നു അത്... അതേ വിശ്വാസ്സം അഞ്ചു് വർഷത്തെ ഭരണത്തിനു ശേഷവും ഉയർന്ന ജനപിന്തുണയിൽ നിലനിർത്താൻ കഴിഞ്ഞതിലെ ജനാധിപത്യ താല്പര്യങ്ങളാണ് രാഷ്ട്രീയ പാർട്ടികൾ മുഖവിലക്കെടുക്കേണ്ടതും,, ചർച്ച ചെയ്യേണ്ടതും,, തങ്ങളുടെ പോരായ്മകളെ പരിഹരിക്കേണ്ടതും....

     ദേശീയ രാഷ്ട്രീയത്തിൽ മോദിയെ നേരിട്ട പ്രതിപക്ഷ രീതികളെല്ലാം തന്നെ ശുഷ്കവും അപ്രായോഗികവും ആയിരുന്നു എന്ന് നിസ്സംശയം പറയാൻ കഴിയും... ഗുജറാത്ത് കലാപത്തിലെ ആരോപണങ്ങളായിരുന്ന ശൂലവും,, ഗർഭിണിയും ജനങ്ങൾ കേട്ടു മടുത്തിരുന്നു... ആ ആരോപണങ്ങളിലെ പൊള്ളത്തരങ്ങൾ ജനങ്ങൾ മനസ്സിലാക്കിയത് നിങ്ങൾ പ്രതിപക്ഷക്കാർ മനസ്സിലാക്കിയില്ല... ഇതേ ആരോപണങ്ങളെ മുൻനിർത്തി നിങ്ങൾ നടത്തിയ പ്രചരണങ്ങളെ തള്ളിയാണ് 2014 ൽ മോദിയെ ജനങ്ങൾ തെരഞ്ഞെടുത്തതെന്ന് എങ്കിലും നിങ്ങൾ ഓർക്കണമായിരുന്നു... ഏറ്റവും കുറഞ്ഞത് അതേ ആരോപണങ്ങൾ പ്രതിരോധിക്കാൻ കഴിയാത്ത തെളിവുകളോടെ പുനഃ രവതരിപ്പിക്കാനെങ്കിലും നിങ്ങള്ക്ക് കഴിയണമായിരുന്നു.... അതിനു കഴിയാതെ പോയത് നിങ്ങളുടെ ആരോപണങ്ങളിലെ പൊള്ളത്തരം പുറത്തു കൊണ്ടുവരുന്നതിനാണ് സഹായിച്ചത് എന്ന് കാണണം.. ജനങ്ങളുടെ ചിന്താശേഷിയെ നിങ്ങൾ ദേശീയ പ്രതിപക്ഷം നീതീകരണമില്ലാത്ത രീതിയിൽ ഇകഴ്ത്തി ചിന്തിച്ചു എന്ന് വേണം കരുതാൻ...

     കൊണ്ഗ്രെസ്സ് എന്ന പാർട്ടിയുടെ നിവർത്തികേടാണ് ദേശീയ രാഷ്ട്രീയത്തിൽ മോദിക്ക് കുറേയൊക്കെ അനുകൂലമായത് എന്ന് കാണുന്നതിൽ തെറ്റില്ല... ജനം തുലനം ചെയ്യുമ്പോൾ നരേന്ദ്രമോഡി എന്ന പ്രഭാവത്തിന് എതിരായി കാണിക്കാൻ പ്രതിപക്ഷത്തിന് ആരുമില്ലായിരുന്നു എന്നതാണ് സത്യം... ലോക ചരിത്രം പരിശോധിച്ചു നോക്കൂ... വ്യക്തി പ്രഭാവം ഉയർന്ന നിലയിൽ നിൽക്കുന്ന തികഞ്ഞ സ്വേശ്ചാതി പതിയായ വ്യക്തിത്വങ്ങളെ പോലും ജനം അംഗീകരിച്ചിട്ടുണ്ട്... അത് വ്യക്തി പ്രഭാവത്തിന്റെ ഒരു ശാസ്ത്രമാണ്.. പിന്നെയാണോ കൂപ്പു കൈകളോടെ ജനങ്ങളെ കാണുന്ന,, പാർലമെന്റിനെ നമസ്കരിച്ചു കയറുന്ന,, പാവപ്പെട്ടവന്റെ ശൗചാലയത്തിനും,, ആഹാരം പാകം ചെയ്യാനുള്ള ഗ്യാസിനും,, കയറിക്കിടക്കാനുള്ള വീടിനും,, തൊഴിൽ തുടങ്ങാനുള്ള കൈത്താങ്ങിനും അങ്ങനെ പലതിനും പ്രാധാന്യം കൽപ്പിക്കുന്ന ഭരണാധികാരിയെ ഒരു ജനതയ്ക്ക് അവഗണിക്കാൻ കഴിയുന്നത്...?? ഇരുപത്തി മൂന്നു രാഷ്ട്രീയ കക്ഷികളിലും നരേന്ദ്ര മോഡിക്കു തുല്യനായ വ്യക്തി പ്രഭാവം സ്പുരിക്കുന്ന ഒരുവൻ ഇല്ലായിരുന്നു എന്നത് സത്യമാണ്... അതിലെ രസകരമായ കാര്യം;; ബി ജെ പി യിലെ മോദിജി ഒഴികെയുള്ള അഞ്ചു നേതാക്കളെ നേരിടാൻ കഴിയുന്ന വ്യക്തി പ്രഭാവമുള്ളവരാരും പ്രതിപക്ഷ പാർട്ടികളിൽ ഇല്ല എന്നതാണ് സത്യം.. അത് സമ്മതിക്കാത്തത് ഇതേ പ്രതിപക്ഷ പാർട്ടിക്കാർ മാത്രം.... ജനങ്ങളല്ല.... പ്രതിപക്ഷത്തിന്റെ നേതാവായി അവരോധിച്ചിരുന്ന രാഹുൽജിയെ മാത്രം എടുത്തു പറഞ്ഞു പഴി പറയാൻ ഞാൻ തയ്യാറാകുന്നില്ല... ആ സ്ഥാനത്തേക്കു പോലും വരാൻ കെൽപ്പുള്ള ആളുകൾ പ്രതിപക്ഷ സ്രെണിയിൽ ഇല്ലാതെ പോയി എന്നതാണ് മനസ്സിലാക്കേണ്ടത്...

     ജനങ്ങൾ നോക്കിക്കണ്ട അഴിമതി ആരോപണങ്ങളായിരുന്നു മറ്റൊരു പ്രധാന വസ്തുത.... ആറുലക്ഷം കോടിയിൽപ്പരം തുകയുടെ അഴിമതി ആരോപണങ്ങളുടെ  വിഴിപ്പിനെ ഇറക്കിവെച്ച ആശ്വാസ്സത്തിലായിരുന്നു ജനം 2014 ൽ മോദിക്ക് വോട്ടു ചെയ്തത്... ആരോപണത്തിനപ്പുറം തെളിയിക്കാൻ കഴിയാതെപോയ റാഫേൽ മാത്രമായിരുന്നു മോദിക്കെതിരെയുള്ള അഴിമതി ആരോപണം... അതും മറകൾ പലതു നീക്കി പോയപ്പോൾ എത്തിയത് ചിദംബരം പോലെയുള്ള നേതാക്കളുടെ മുഖങ്ങളിലേക്കും....

     അഴിമതി ആരോപണങ്ങൾക്ക് നേതൃത്വം കൊടുക്കുന്ന നെഹ്‌റു കുടുംബം നിരന്തരം കോടതി കയറി ജാമ്യമെടുത്ത് നടക്കുന്നത് ജനങ്ങൾ കാണുന്നില്ല എന്ന് കരുതിയത് നിങ്ങളുടെ തെറ്റ്...  ആറുലക്ഷം കോടിയുടെ അഴുമതിയുടെ ചരിത്രത്തിലേക്ക് രാജ്യത്തെ തിരികെ  കൊണ്ടു പോകേണ്ടതില്ല എന്ന് ജനം കരുതി... ചിദംബരം, മകൻ, ഭാര്യ,, സോണിയ ജി, രാഹുൽ ജി, വധേര  തുടങ്ങി എല്ലാവരും അഴിമതി കേസുകളിൽ ജാമ്യത്തിൽ...  യാതൊരു പ്രഭാവവുമില്ലാത്ത അഴിമതി കൂട്ടങ്ങൾക്കു ഭരണം നൽകേണ്ടതില്ല എന്ന് തീരുമാനിച്ച ജനതയെ അഭിനന്ദിക്കുകയല്ലേ വേണ്ടത്???

     നരേന്ദ്ര മോഡിക്കെതിരെ ഉയർത്തിയ ആരോപണങ്ങൾ പൊള്ളായാണെന്നു കണ്ടതാണ് പ്രതിപക്ഷത്തെ കൂടുതൽ ദുര്ബലമാക്കിയത്...  റാഫേൽ അഴിമതി പ്രതിപക്ഷത്തിന് തെളിയിക്കാൻ കഴിയാതെ പോയത് മാത്രമല്ല പ്രതിപക്ഷത്തെ പരാജയപ്പെടുത്തിയത്... പ്രതിപക്ഷം ഉയർത്തിയ ആരോപണങ്ങൾ കഴമ്പില്ലാത്തവയായിരുന്നു എന്നതാണ് വസ്തുത.... രാജ്യം നേരിടുന്ന ചർച്ച ചെയ്യപ്പെടേണ്ട അനവധി പ്രസക്തമായ കാര്യങ്ങൾ പ്രതിപക്ഷത്തുനിന്നു പൊതുജനം പ്രതീക്ഷിക്കുമ്പോൾ പ്രതിപക്ഷം പറയുന്നു;; മോഡിജി ഭാര്യക്ക് ചെലവിനു കൊടുത്തില്ല,, മോദിജി ഫോട്ടോയ്ക്ക് പോസ് ചെയ്യുന്നു,, മോദിജി പത്തു ലക്ഷത്തിന്റെ കോട്ടിടുന്നു,, മോദിജി വിദേശത്തു പോകുന്നു,, മോദിജി ക്ഷേത്ര ദർശനം നടത്തുന്നു അങ്ങനെ പലതും..... ഇതിലൊന്നും ജനങ്ങൾ ആശങ്കാകുലർ ആയിരുന്നില്ല... പ്രിയ പ്രതിപക്ഷമേ...  മോദിജി ഭാര്യക്ക് ചെലവിന് കൊടുത്തില്ലെങ്കിൽ ആ സ്ത്രീക്ക് പരാതി ഉന്നയിക്കാൻ ഇവിടെ അതിന്റേതായ നിയമ ഫോറങ്ങളുണ്ട്.. അതാണോ പ്രതിപക്ഷത്തിന്റെ തലവേദന... പകരം രാജ്യത്തെ അശരണരായ യുവതികൾക്ക് വേണ്ടി ശബ്ദമുയർത്തുകയും അവരെ പരിപാലിക്കുന്നതിൽ സർക്കാർ വീഴ്ച കാണിക്കുന്നുണ്ടെങ്കിൽ ഉയർത്തിക്കാട്ടുകയും, പ്രതികരിക്കുകയും ചെയ്തിരുന്നെങ്കിൽ നിങ്ങൾ എത്രയധികം അംഗീകരിക്കപ്പെടുമായിരുന്നു....??  കഴമ്പില്ലാത്ത ആരോപണങ്ങൾ ഉന്നയിച്ചു നിങ്ങൾ ജനങ്ങൾക്ക് മുൻപിൽ സ്വയം അപഹാസ്യരായി... കഴമ്പുള്ള ആരോപണങ്ങൾ ഉന്നയിക്കാൻ കാരണമില്ലാത്ത നേതാവായി മോദിജി ജനമനസ്‌സുകളിൽ  വളരുകയായിരുന്നു എന്ന് നിങ്ങൾ അറിയാതെ പോയി... നിങ്ങൾ അതിനുള്ള വളമായി എന്ന് പറയുന്നതും ശരി തന്നെയാണ്...

     മത ന്യൂനപക്ഷങ്ങളെ പ്രീണിപ്പിച്ചു കൂടെ നിർത്തുകയും, ഭൂരിപക്ഷ മത വിഭാഗങ്ങളെ ഭിന്നിപ്പിച്ചു നിർത്തുകയും ചെയ്യുക എന്ന പതിവ് അടവ് ഫലിക്കാതെ പോയി എന്ന് കാണണം... കാരണം മതന്യൂനപക്ഷത്തെ പ്രീണിപ്പിച്ചു മുതലെടുക്കുക എന്ന തന്ത്രം ഇതുവരെ പ്രതിപക്ഷ കക്ഷികൾ നടത്തിയിരുന്നത് ഒരുതരം ഒളിച്ചു കടത്തലാണ്... പക്ഷെ  മതന്യൂനപക്ഷത്തെ പ്രീണിപ്പിച്ചു ഒന്നിപ്പിച്ചു  നിർത്താനുള്ള നിങ്ങളുടെ അമിതമായ പ്രീണന  തന്ത്രങ്ങൾ ഭൂരിപക്ഷം അമർഷത്തോടെ നോക്കിക്കാണുന്ന വിധത്തിലേക്ക് ഉയർന്നത് നിങ്ങൾ തിരിച്ചറിഞ്ഞില്ല.... ന്യൂനപക്ഷത്തിന് ഒന്നായി നിന്ന് വോട്ടു ചെയ്യാൻ കഴിയുമെന്ന വസ്തുത തിരിച്ചറിഞ്ഞു പ്രവർത്തിച്ച നിങ്ങൾ ഭൂരിപക്ഷം ഒന്നിച്ചു നിന്ന് വോട്ടുചെയ്യാനുള്ള സാധ്യത തിരിച്ചറിഞ്ഞപ്പോൾ വൈകി... പരിഹാരമായി തെരഞ്ഞെടുപ്പടുത്തപ്പോൾ രാഹുലിനെ കുറി തോടുവിച്ചു അമ്പലങ്ങളിൽ കയറ്റിയിറക്കിയതിലെ കപടത ജനം തിരിച്ചറിഞ്ഞു പോയി... മോഡി അധികാരത്തിൽ വന്നാൽ മുസ്ളീം ജനത അനുഭവിക്കാൻ പോകുന്ന കഷ്ടതയുടെ ഭീകരത 2014 ൽ നിങ്ങൾ വിവരിച്ചത് പൊള്ളയായിരുന്നു എന്ന് തെളിയിക്കാൻ കഴിഞ്ഞ അഞ്ചു വര്ഷം മുസ്‌ലിം ജനത ഇവിടെ അനുഭവിച്ച സുരക്ഷിതത്വം മാത്രം മതിയായിരുന്നു മോദിജിക്ക്‌ ഒരു ജനതയ്ക്ക് മുന്നിൽ തെളിവായി നല്കാൻ... ഫലത്തിൽ നിങ്ങളിൽ നിന്നും ഭൂരിപക്ഷവും,, ന്യൂനപക്ഷവും അകന്നു... നിങ്ങൾ നിൽക്കുന്ന മണ്ണിനെക്കുറിച്ചു നിങ്ങൾ തിരിച്ചറിയണമായിരുന്നു... എന്തു രാഷ്ട്രീയ വങ്കത്തരവും കാണിച്ചിട്ട് പകരം ഇന്ദിരയുടെ മൂക്കുള്ള കൊച്ചുമകൾ പരിഹാരമാകുമെന്നു നിങ്ങൾ കരുതി.... വീണ്ടും പറയുന്നു നിങ്ങൾ ജനങ്ങളുടെ വിലയിരുത്തൽ ശക്തിയെ ഇകഴ്ത്തി വിലയിരുത്തിയാണ് കഴിഞ്ഞ നാളുകളിൽ രാഷ്ട്രീയ പ്രവർത്തനം നടത്തിയത്...

     ദേശീയത ഭാരത ജനതയുടെ വികാരവും, അഭിമാനവുമാണെന്ന് നിങ്ങൾക്കുൾപ്പടെ എല്ലാവർക്കും തിരിച്ചറിവുണ്ടായിരുന്നു.... കൊണ്ഗ്രെസ്സ് ദേശീയതയിൽ ഊന്നിയ രാഷ്ട്രീയത്തിലായിരുന്നു വളർന്നതെന്നാണ് ഞാൻ കരുതുന്നത്... തീവ്രവാദികളെ സൗമ്യ നിലപാടോടെ സമീപിക്കുകയും, ദേശീയതയെ തള്ളിപ്പറയുകയും ചെയ്യുകവഴി ആരുടെ പിന്തുണയാണ് നിങ്ങൾ പ്രതീക്ഷിച്ചത്?? തീവ്രവാദികളെ വെള്ള പൂശുക വഴി ഇസ്‌ലാമിക സമൂഹത്തിന്റെ പിന്തുണ ലഭിക്കും എന്ന് കരുതിയ നിങ്ങൾ യഥാർത്ഥത്തിൽ ഇസ്ളാം സമൂഹത്തെ അപമാനിക്കുകയാണ് ചെയ്തത്... തീവ്രവാദത്തെ എതിർക്കുന്ന നിലപാട് തന്നെയാണ് തങ്ങൾക്കെന്നു അടിവരിയിട്ടുപറയാൻ രാജ്യത്തെ ബഹുഭൂരിപക്ഷം ഇസ്‌ലാം മത വിശ്വാസ്സികൾക്കും ബിജെപി ക്കു വോട്ടു ചെയ്തു കാണിക്കേണ്ട അവസ്ഥ നിങ്ങൾ സംജാതമാക്കി എന്ന് വിലയിരുത്തേണ്ടി വരും... ഓ വൈ സി,, യുടെ പല പ്രസ്ഥാവനകളും,, മണിശങ്കര അയ്യർ പാകിസ്ഥാനിൽ പോയി നിന്ന് ഇന്ത്യൻ പ്രധാന മന്ത്രിയെ പുറത്താക്കാൻ നടത്തിയ സഹായ അഭ്യർഥനയും എത്ര അമർഷത്തോടെയാണ് ഭാരത ജനത കണ്ടതെന്ന് നിങ്ങൾ തിരിച്ചറിഞ്ഞില്ല... തിരിച്ചറിഞ്ഞിരുന്നെങ്കിലും അറിയാത്തതായി നടിച്ചു... അതെല്ലാം ന്യൂനപക്ഷ വോട്ടുകളായി പരിണമിക്കുമെന്ന് നിങ്ങൾ തെറ്റിധരിച്ചു... കാരണം നിങ്ങൾ ഭാരത ജനതയുടെ ചിന്താമണ്ഡലത്തെ ചെറുതായികണ്ടു..

     നോട്ടു നിരോധനത്തിലും,, ജി സ് ടി യിലും പ്രതിപക്ഷം ഇരുട്ടിൽ തപ്പി... ഈ രണ്ടു കേന്ദ്ര സർക്കാർ തീരുമാനങ്ങളിലും എന്തു നിലപാട് സ്വീകരിക്കണമെന്ന വ്യക്തത പോലും പ്രതിപക്ഷത്തിന് ഉണ്ടായിരുന്നില്ല... നോട്ടു നിരോധനത്തെ ആദ്യ ദിവസ്സങ്ങളിൽ കോൺഗ്രസ്സ് അനുകൂലിക്കുകയാണ് ചെയ്തത്... മറ്റു മാർഗ്ഗങ്ങൾ അവർക്കില്ലായിരുന്നു... അത്രയ്ക്ക് ചടുലമായ ഒരു നീക്കമായിരുന്നു മോദിയുടെ ഭാഗത്തുനിന്നും ഉണ്ടായത്... കള്ളപ്പണം ഇല്ലാതാക്കാൻ കഴിഞ്ഞില്ലെന്നു പറയുന്ന പ്രതിപക്ഷത്തിന് കള്ളനോട്ട് ഇല്ലാതാക്കാൻ കഴിഞ്ഞു എന്ന് സമ്മതിക്കേണ്ടിവന്നു.. രാജ്യത്തിനു നല്ലതുവരാൻ ഏത് ശക്തമായ തീരുമാനവും എടുക്കാൻ പ്രാപ്തനായ പ്രധാനമന്ത്രിയാണ് മോഡി എന്ന ഇമേജ് ആണ് നോട്ടു നിരോധനവും,, ജി സ് ടി യും മോദിക്ക് നൽകിയത്.. അതിനെയൊന്നും ക്രിയാത്മകമായി ജനങ്ങളെ വിശ്വാസ്സത്തിലെടുത്തു പ്രതികരിക്കാൻ പ്രതിപക്ഷത്തിന് കഴിഞ്ഞില്ല... അല്ലെങ്കിൽ അവർക്ക് അതിനുള്ള കാരണങ്ങൾ കിട്ടിയില്ല.... 

     മോദിക്ക് അനുകൂലമായി കാര്യങ്ങൾ പരിണമിച്ചത് പുൽവാമ ആക്രമണശേഷമാണെന്ന് ചിലർ പറഞ്ഞു കേട്ടു..  പുൽവാമ ആക്രമണം മോദിക്ക് അനുകൂലമായതെങ്ങനെ എന്ന് നിങ്ങൾ എന്തുകൊണ്ട്  വിശകലനം ചെയ്യുന്നില്ല..!!?? നിങ്ങൾ തീവ്രവാദത്തിന് അനുകൂല നിലപാടും മണിശങ്കര അയ്യരെപ്പോലെയുള്ളവരുടെ പ്രസ്താവനകളെ പിന്താങ്ങുന്നവരുമാണ്... ദേശീയതയെ പിൻ കണ്ണു കൊണ്ടു പോലും സ്വീകരിക്കാൻ തയ്യാറാകാത്ത പ്രതിപക്ഷത്തെ എങ്ങനെ ഒരു ജനത വിശ്വാസ്സത്തിലെടുക്കും???  നിങ്ങളുടെ സമീപനങ്ങളായിരുന്നു തെറ്റ്.. അല്ലെങ്കിൽ ഭരിക്കുന്ന പാർട്ടിയുടെ പരാജയമായി മാത്രമല്ലേ പുൽവാമ കണക്കാക്കപ്പെടുമായിരുന്നുളൂ!?? രാഷ്ട്രത്തെ ജനങ്ങളെ ഒന്നായിക്കണ്ട് ദേശീയതയിൽ വെള്ളം ചേർക്കാത്ത നിലപാടുകൾ സ്വീകരിക്കാൻ കഴിഞ്ഞിരുന്നെങ്കിൽ നിങ്ങൾക്ക് ഇത്രയും വലിയ പരാജയം ഏറ്റുവാങ്ങേണ്ടി വരില്ലായിരുന്നു... ഏറ്റവും കുറഞ്ഞത് ഒരു പ്രതിപക്ഷ നേതാവിനെയ്‌തെങ്കിലും ഈ വലിയ ജനാധിപത്യ സംവിധാനത്തിനു സംഭാവന ചെയ്യാൻ നിങ്ങൾക്കു കഴിയുമായിരുന്നു... ഒരു പ്രതിപക്ഷ നേതാവിനെ സംഭാവന ചെയ്യുവാൻ പോലും പ്രാപ്തിയില്ലാത്ത നിങ്ങൾ ജനാധിപത്യ പ്രക്രിയയിൽ എത്രത്തോളം അപ്രസക്തരായി എന്ന് വിലയിരുത്തിയാൽ അതിന്റെ ഗുണം നാടിനുമുണ്ടെന്ന് പറയുന്നതിൽ യാതൊരു ആക്ഷേപവും ഇല്ല...

     കാര്യങ്ങൾ കേരളത്തിലേക്ക് വന്നാലോ?? വിജയവും,, പരാജയവും ശബരിമലയിൽ ഒതുക്കി നിർത്താൻ എല്ലാ കൂട്ടരും ശ്രമിക്കുന്നു എന്നതാണ് സത്യം... ബിജെപി ശബരിമല എന്ന വിഷയത്തിന്റെ പേരിൽ മാത്രം വിജയം പ്രതീക്ഷിച്ചു... രാജ്യമാകമാനം ആഞ്ഞടിക്കുന്ന മോഡി തരംഗത്തെ കേരളത്തിലേക്ക് കൊണ്ടുവരാൻ കേരള ബി ജെ പി ക്ക് കഴിയാതെ പോയി... എങ്കിലും ബി ജെ പി പരാജയമായിരുന്നു എന്ന് പറയാൻ സാധിക്കില്ല.. കേരളത്തിൽ ആകമാനം ബിജെപി ക്ക് വളരെ അധികം വോട്ടു നേടാൻ കഴിഞ്ഞു... ബി ജെ പി ക്ക് വോട്ടു ചെയ്യാൻ മടിച്ചു നിന്ന ഒരു വലിയ വിഭാഗം ബിജെപി ക്കു വോട്ടുചെയ്യാൻ ശബരിമല വിഷയം കാരണമായി... അത് ഭാവിയിലും ബിജെപി ക്കു ഗുണം ചെയ്യും... കൂടുതൽ ജനകീയ വിഷയങ്ങളിൽ ഇടപെടുകയും,, കഴമ്പുള്ള നേതൃനിര തങ്ങൾക്കുണ്ടെന്നു തെളിയിക്കാനും കഴിഞ്ഞാൽ ബിജെപി ക്കു കേരളം കിട്ടാക്കനി ആകില്ല.. എന്നാൽ ശബരിമലയെ മാത്രം ആശ്രയിച്ചായിരുന്നു കഴിഞ്ഞ ഇലക്ഷനെ ബിജെപി നേരിട്ടത്.... ശബരിമല വിഷയം വന്നില്ലായിരുന്നു എങ്കിൽ ബിജെപി എന്ത് പ്രവർത്തനത്തിന്റെ അടിസ്ഥാനത്തിൽ ആയിരുന്നു കേരളത്തിൽ പ്രതീക്ഷയെങ്കിലും പുലർത്താൻ കഴിയുമായിരുന്നത്?? 

     കടുത്ത ഭരണ വിരുദ്ധ വികാരം കേരളത്തിൽ ഉണ്ടായിരുന്നു എന്നു തന്നെ കാണണം... യു ഡി ഫ് നെ വിജയിപ്പിക്കാൻ വേണ്ടി ആയിരുന്നില്ല ജനം വോട്ടുചെയ്തത്... മറിച്ചു് എൽ ഡി എഫ് നെ പരാജയപ്പെടുത്തുവാൻ വേണ്ടി ആയിരുന്നു... അതിൽ ബി ജെ പി മനസ്സോടെ യു ഡി ഫ് ന് വോട്ടു ചെയ്ത അനേകങ്ങളുണ്ട്... തങ്ങളുടെ വോട്ടു വിഘടിച്ചു പോയി എൽ ഡി എഫ് വിജയിക്കരുതെന്ന കർശന ബുദ്ധിയോടെ ആയിരുന്നു ജനം വോട്ടു ചെയ്തത്... ആ പൊതുജന വികാരത്തിന്റെ ഏകീകരണം ഉണ്ടാക്കുന്നതിൽ ശബരിമല വലിയ പങ്കു വഹിച്ചു എന്നത് സത്യമാണെങ്കിലും മറ്റനേകം കാരണങ്ങളും നിഴലിച്ചുതന്നെ നിൽക്കുന്നു എന്നതാണ് എൻ്റെ പക്ഷം...

     ശബരിമലയായിരുന്നു തങ്ങളുടെ പരാജയ കാരണം എന്ന് പ്രചരിപ്പിക്കുകയാണ് എൽ ഡി എഫ് നു ഗുണം ചെയ്യുന്നത് എന്നാണ് മനസ്സിലാക്കാക്കുവാൻ കഴിയുന്നത്... പുരോഗമനപരമായ ആശയത്തിനു വേണ്ടിയും,, സ്ത്രീ തുല്യതക്കു വേണ്ടിയും നിലപാട് സ്വീകരിച്ചതിൽ ലഭിച്ച താൽക്കാലിക തിരിച്ചടി എന്ന് ന്യായീകരിക്കാൻ അവർക്ക് കഴിയുന്നു... അതുവഴി  വോട്ടു ചെയ്ത ജനം കണ്ട പല ഭരണ പരാജയങ്ങളും,, പോരായ്മകളും മറച്ചു പിടിക്കാൻ ശ്രീ പിണറായിക്കും കൂട്ടർക്കും വഴി തെളിഞ്ഞിരിക്കുന്നു.. 

     ശബരിമല മാത്രമായിരുന്നോ ജനങ്ങൾ പിണറായി ഭരണത്തെ വെറുക്കാൻ കാരണം എന്ന്  എൽ ഡി ഫ് തന്നെ വിലയിരുത്തുന്നത് നന്നായിരിക്കും... പിണറായി ഭരണത്തിന്റെ ഏതു മേഘലയിലാണ് ജനങ്ങളുടെ പ്രീതി വാങ്ങിയെടുക്കാൻ കഴിഞ്ഞിട്ടുള്ളത്?? കമ്യുണിസ്റ്റ്റുകളിൽ നിന്ന് പൊതുജനം ഇഷ്ട്ടപ്പെടാത്ത രീതിയിൽ നിങ്ങൾ മതകാര്യങ്ങളിൽ ഇടപെടുകയും ന്യൂനപക്ഷ പ്രീണനങ്ങൾ നടത്തുകയും ചെയ്തില്ലേ?? ന്യൂനപക്ഷങ്ങൾക്കു സഹായങ്ങൾ നൽകി അവരെ സന്തോഷിപ്പിക്കുന്നത്‌ ഇവിടുത്തെ ഹിന്ദു സമൂഹത്തെ ഒരിക്കലും അലോസരപ്പെടുത്തുമായിരുന്നില്ല... പക്ഷെ നിങ്ങൾ അനാവശ്യമായി ഹിന്ദുവിനെ ആക്രമിക്കാൻ മുതിർന്നത് എന്തിനു വേണ്ടിയാണ്??? അതിവിടുത്തെ ഇതര മതസ്ഥരിൽ പോലും എതിർപ്പുകളാണ് ഉണ്ടാക്കിയത് എന്ന് മനസ്സിലാക്കാനുള്ള സംഘടനാ സംവിധാനം നിങ്ങൾക്കില്ലാതെ പോയോ?? നിരന്തരം ഹിന്ദു ക്ഷേത്രങ്ങളിൽ നിങ്ങൾ ആക്രമണങ്ങൾ നടത്തിയതെന്തിന്?? അത്തരം ആക്രമണങ്ങളെ നേതൃത്വം അപലപിക്കാൻ തയ്യാറാകാതിരിക്കുകയും,, ചെറു പുഞ്ചിരിയോടെ അനുമോദിക്കുകയും ചെയ്തതെന്തിന്?? ന്യൂന പക്ഷത്തിനു മാത്രമല്ല;; ഭൂരിപക്ഷത്തിനും വോട്ടുണ്ടെന്നും ഒന്നിച്ചു നിൽക്കാൻ പ്രാപ്തരാണെന്നും നിങ്ങൾ മറന്നു പോയി... ഒരു ചെറിയ കല്ല് ഒരു ചെറിയ കുളത്തിൽ ഓളങ്ങളെ സൃഷ്ട്ടിക്കും... പക്ഷെ സമുദ്രത്തിൽ ഓളങ്ങളെ സൃഷ്ട്ടിക്കാൻ കഴിയില്ല... ഒരു ചെറിയ കല്ല് ഒരു ചെറുകുളത്തിൽ ഓളങ്ങളെ സൃഷ്ടിക്കുന്നത് പോലെയാണ് ഒരു ചെറിയ വിഷയം ന്യൂനപക്ഷങ്ങൾക്കിടയിൽ വളരെ വേഗത്തിൽ അലകളെ സൃഷ്ടിക്കുന്നത്... എന്നാൽ ഭൂരിപക്ഷമാകുന്ന സമുദ്രത്തിൽ  ഉണ്ടാകുന്ന അലകൾ തീഷ്ണവും,, വിനാശകരവും,, ദീർഘകാലം നിലനിൽക്കുന്നതും ആകുമെന്ന് നിങ്ങൾ തിരിച്ചറിയാതെ പോയി....

     മതവും, ക്ഷേത്രവും, പള്ളിയും എല്ലാം മാറ്റി വെയ്ക്കാം... ക്രമ സമാധാനത്തിൽ കേരളം എത്രയോ പിന്നോട്ട് പോയി..!!?? ലോക്കപ്പ് പീഡനങ്ങളും,, ലോക്കപ്പ് മരണങ്ങളും കേരളം പലതു കണ്ടു... അവിടെയെല്ലാം കുറ്റക്കാരെ നിങ്ങൾ സംരക്ഷിച്ചില്ലേ?? എവിടെയും വേട്ടക്കാരനൊപ്പമാണ് നിങ്ങൾ എന്ന ചിന്ത ജനങ്ങൾക്കുണ്ടായി.... ടി പി വധക്കേസ്സ് പ്രതികളെ നിങ്ങൾ കൈവെള്ളയിൽ വെച്ച് പരിപാലിക്കുന്നത് ജനം ഇഷ്ട്ടപ്പെടുമെന്ന് നിങ്ങൾ കരുതിയോ?? നിങ്ങൾ തന്നെ എത്ര ജീവനുകൾ ഈ ഭരണ കാലത്തു എടുത്തൂ... തെരഞ്ഞെടുപ്പിന് ദിവസങ്ങൾക്കു മുൻപ് പോലും നിങ്ങൾ അതിനു മുതിർന്നില്ലേ?? പത്രക്കാരെയും, പൊതുജനത്തെയും ആട്ടി ഓടിക്കുന്ന പിണറായി കേരള ജനതയ്ക്ക് അഭിമതനാകുമെന്ന് നിങ്ങൾ കരുതിയത് എന്തു കൊണ്ടാണ്?? തീവ്രവാദികളുടെ സുരക്ഷിത താവളമാണ് കേരളം എന്ന പൊതുജന ധാരണ ജനിച്ചത് നിങ്ങളുടെ ഭരണകാലത്തല്ലേ?? 

     ജനങ്ങളോട് ധാർഷ്ട്യത്തോടെ സംസാരിക്കുന്ന പിണറായിയെപ്പോലെയും,, മണിയെപ്പോലെയും ഉള്ള മന്ത്രിമാരെ ജനം ഇഷ്ട്ടപ്പെടുമെന്ന് കരുതിയോ?? കൃത്യമായ ഡാം മാനേജ്മെന്റിന് കഴിയാതെ കേരളത്തെ പ്രളയത്തിൽ മുക്കിയത് ആരും തിരിച്ചറിയുന്നില്ല എന്ന് നിങ്ങൾ കരുതിയോ?? ഡാമിൽ വെള്ളം നിറഞ്ഞു കയറുന്നതു കണ്ട് 'ഡാം തുറന്നു വിടുന്നില്ലേ??' എന്ന് ചോദിച്ച പത്രക്കാരോട്,, ""നിങ്ങള്ക്ക് പടം പിടിക്കാൻ തുറക്കുന്നില്ല" എന്ന് പരിഹസിച്ച മന്ത്രി മണിയേയും അതിനു ശേഷമുണ്ടായ ദുരന്തത്തെയും ആരും മറന്നു പോയെന്നു കരുതരുത്...

     പ്രളയത്തിൽ എല്ലാം നഷ്ടപ്പെട്ടവർക്ക് അനുഭവിക്കേണ്ടി വന്ന രണ്ടാം ദുരന്തമായിരുന്നു ക്യാമ്പുകളിൽ സിപിഎം വരുത്തി വെച്ചത്.... സുമനസ്സുകൾ ദാനമായി നല്കിയതെല്ലാം അടക്കിവെച്ച് അവർ നടത്തിയ പ്രവർത്തികൾ ക്യാമ്പിൽ സന്ദർശിച്ചവന്റെ പോലും വോട്ടുകൾ സി പി എം ന് എതിരാക്കുന്നതായിരുന്നു.. അത്രയധികം ധാർഷ്ട്യവും,, അഹങ്കാരവും അവർ കാട്ടി... 

     പ്രളയത്തിനു ശേഷം ഭിക്ഷാടനത്തിൽ മാത്രമല്ലെ നിങ്ങൾ ശ്രദ്ധ കേന്ദ്രീകരിച്ചത്?? എന്ത് നവകേരള നിർമ്മാണമാണ് നിങ്ങൾ നടത്തിയത്... പ്രളയത്തെ നേരിടാൻ ലഭിച്ച തുകയിൽ ഭൂരിഭാഗവും നിങ്ങൾ നിങ്ങളുടെ ഇഷ്ട്ടങ്ങൾക്കനുസ്സരിച്ചു വിനിയോഗിക്കുകയായിരുന്നില്ലേ?? കേന്ദ്ര ഗവണ്മെന്റ് ഒരുക്കിയ പല പദ്ധതികളുടെയും ഗുണം ജനങ്ങളിലെത്താതിരിക്കാൻ രാഷ്ട്രീയം മുൻനിർത്തി നിങ്ങൾ ശ്രമിച്ചില്ലേ?? ഇതെല്ലാം ജനങ്ങൾ വീക്ഷിക്കുന്നുണ്ടായിരുന്നു... നിങ്ങൾ ധാർഷ്ട്യത്തോടെ ഗർജ്ജിച്ചു പറഞ്ഞത് കേരള ജനത വിശ്വസ്സിച്ചിരുന്നില്ല.. നിങ്ങളുടെ ഗുണ്ടാ ശക്തി ഓർത്ത് പലരും പ്രതികരിച്ചിരുന്നില്ല എന്ന് മാത്രം...പകരം വോട്ടു ദിനത്തിനായി കാത്തിരുന്നു...

സി പി എം ന്റെ സൈബർ സൈദ്ധാന്തിക വക്താക്കളായി ദീപാ നിശാന്തിനേയും,, രശ്മി പശുപാലനേയും,, റീമാ കല്ലിങ്ലിനേയും,, ആഷിക് അബുവിനേയും ect നിയമിച്ചു നൽകി നിങ്ങൾ നേതൃത്വം മറി നിന്നപ്പോൾ ഇക്കൂട്ടർ പാർട്ടിയെ തങ്ങൾക്കു മാത്രം വളരാൻ ഉതകുന്ന കമ്പോസ്റ്റു വളമാക്കി മാറ്റിക്കൊണ്ടാരിക്കുകയായിരുന്നു എന്ന് നിങ്ങൾ തിരിച്ചറിഞ്ഞില്ല... സൈബർ പോരാളികർ എതിർ ഫലം ഉണ്ടാക്കുന്നതിനു കാരണമായി എന്ന്, ഇന്ന് നിങ്ങൾ നടത്തുന്ന വിലയിരുത്തൽ കാലങ്ങൾക്കു മുൻപേ നടത്തേണ്ടതായിരുന്നു...

അദ്ധ്യാപകരുടെ കസ്സേര കത്തിച്ചും,, അവർക്കു കുഴിമാടങ്ങൾ തീർത്തും അട്ടഹസിച്ച കുട്ടി സഖാക്കന്മാരെ "ആര്ട്ട് ഇൻസ്റ്റലേഷൻ" എന്ന് പറഞ്ഞു നിങ്ങൾ പ്രോഹത്സാസഹിച്ചപ്പോൾ പൊതുജനവും അദ്ധ്യാപകരെ ഇപ്രകാരം സ്വീകരിക്കുന്നത് ഉചിതമെന്നു കരുതും എന്ന് നിങ്ങൾ കരുതിയോ?? ചുംബന സമരവും,, വനിതാമതിലും കേരള ജനതയിൽ അലോസരങ്ങൾ സൃഷ്ട്ടിച്ചത് നിങ്ങൾ തിരിച്ചറിയാതെ പോയി...

കേരളത്തിൽ വിജയിച്ചു നിന്നിരുന്ന പാർട്ടി ആയിരുന്നില്ല ബി ജെ പി.. അതിനാൽ പ്രതീക്ഷയെമുൻനിർത്തി പരാജയപ്പെടുന്നതും ബി ജെ പി ക്കു നേട്ടമാണ്.. എന്നാൽ വിജയിച്ചുകൊണ്ടിരുന്ന സി പി എം കേരളത്തിലും,, കൊണ്ഗ്രെസ്സ് കേന്ദ്രത്തിലും പരാജയപ്പെടുന്നത് കാരണങ്ങളുടെ അടിസ്ഥാനത്തിൽ വിലയിരുത്തപ്പെടേണ്ടതുണ്ട്... അതിനു മുതിരാൻ തയ്യാറുണ്ടോ എന്നതാണ് ഈ പാർട്ടികളുടെ ഭാവി തീരുമാനിക്കുന്ന ചോദ്യം... 

ജനാധിപത്യ സംവിധാനത്തിൽ പ്രതിപക്ഷം അസ്ഥിരമാകുന്നത് രാജ്യത്തിനു അഭികാമ്യമല്ല..... ചോദ്യം ചെയ്തു വികസ്സിക്കുന്നതാണ് ജനാധിപത്യത്തിന്റെ മുഖമുദ്ര..

[Rajesh Puliyanethu

 Advocate, Haripad]

യുദ്ധക്കൊതിയന്മാരും,, അഭിനവ സമാധാന വെള്ളരി പ്രാവുകളും....!!??

     പുൽവാമയിൽ രാജ്യം ധീര യോദ്ധാക്കളെ നഷ്ട്ടപ്പെട്ട് നിൽക്കുകയാണ്... ഒപ്പം രാജ്യത്തിനുളളിൽ കടന്ന് കേവലം ഒരു ചാവേറിന് അത്രയധികം നാശനഷ്ടമുണ്ടാക്കാൻ കഴിഞ്ഞു എന്ന ആത്മാഭിമാനത്തിനേറ്റ പ്രഹരവും,, നാണക്കേടും.... വിഘടന കാലം മുതൽ ഭാരതത്തിന്റെ തകർച്ച കാണുന്നതിൽ മാത്രം താൽപ്പര്യം പ്രകടിപ്പിച്ചു പ്രവർത്തിക്കുന്ന പാകിസ്ഥാൻ എന്ന രാജ്യത്തിന്റെ ഈ ആക്രമണത്തിനുള്ള ബന്ധം... രാജ്യത്തിനുള്ളിലെയും,, പുറത്തെയും വിഘടന വാദികളുടെ വിജയഘോഷങ്ങൾ.... ആത്ഭാഭിമാനമുള്ള ആരാണ് നമ്മുടെ ജവാന്മാരെകൊന്നവരെ ഉന്മൂലനാശം ചെയ്യണമെന്നും,, അതിനായി സഹായമായും,, പ്രേരണയായും നിന്നവരെ ശിക്ഷിക്കണമെന്നും ആഗ്രഹിക്കാത്തത്...!!?? ചോരചീന്തിക്കൊണ്ടു തന്ന ഈ അവസ്ഥയ്ക്ക് പ്രതികാരം ചെയ്യണമെന്ന് ആഗ്രഹിക്കാത്തത്...!!?? ആഗ്രഹിക്കാത്തവർ ഉണ്ടാകും..!! അവർ,, ഈ മരിച്ചവർ സ്വന്തം കുടുംബാംഗങ്ങൾ എന്ന് ചിന്തിക്കാത്ത നിർവികാര കാഴ്ചക്കാർ ആകാം,, രാജ്യത്തിന്റെ ശത്രുക്കൾ ആകാം,, മരിച്ചവർ തെറ്റുകാരാണ് എന്ന് ചിന്തിക്കുന്നവർ ആകാം,, മാനസ്സിക രോഗത്താൽ ചിന്താ ശേഷി നഷ്ടപ്പെട്ടവർ ആകാം,, ഈ കൂട്ടക്കുരുതികൊണ്ട് നേട്ടമുള്ളവർ ആകാം... അങ്ങനെ പലരും ആകാം...!

     പുൽവാമ രാജ്യത്തിന്റെ ഒരേ ഒരുദുഃഖമാണോ എന്നാണ് നാം ആദ്യം ചിന്തിക്കേണ്ടത്... ഒരിക്കലുമല്ല... മുംബൈ സ്ഫോടനം,, കോയമ്പത്തൂർ സ്ഫോടനം,, ഡൽഹി സ്ഫോടനം,, പാർലമെൻറ് ആക്രമണം,,  മുംബൈ ഭീകര ആക്രമണം,, ഉറി സ്ഫോടനം,, അങ്ങനെ ഏതൊരു ഭാരതീയനേയും ഏതുറക്കത്തിൽ വിളിച്ചുണർത്തി ചോദിച്ചാലും മറക്കാതെ പറയുന്ന ആക്രമണങ്ങൾക്കു പുറമേ എത്രയെത്ര വലുതും ചെറുതുമായ ആക്രമണങ്ങൾ?? അവസ്സാനമായി പുൽവാമയിലും... ഇതിനിടയിൽ പാകിസ്ഥാൻ എന്ന ഭീകരവാദികളുടെ സുരക്ഷിത താവളമായ ഒരു രാജ്യത്തിന്റെ പട്ടാളം നേരിട്ട് വെടിനിർത്തൽ കരാർ ലംഘിച്ചു കൊണ്ടു നിർവ്വഹിച്ച അനേകം ആക്രമണങ്ങളിൽ പലിഞ്ഞ അനേകം പട്ടാളക്കാരുടെയും,, പ്രദേശവാസികളുടെയും ജീവനും,, ജീവിതങ്ങളും...

     പാകിസ്ഥാൻ എന്ന ഭീകര രാഷ്ട്രത്തിന്റെ ആക്രമങ്ങളെ പ്രതിരോധിക്കാനും,, പൊരുതാനും ഇത്രകാലം ചിലവാക്കിയ പല സഹസ്ര കോടി തുക ജീവനും അഭിമാനത്തിനും വേണ്ടിയെന്നനിലയിൽ അവഗണിച്ചു തന്നെ പോകട്ടെ... എങ്കിലും..!!

     ഭാരതം ഒരു സ്വതന്ത്രജനാധിപത്യ പരമാധികാരം എന്ന് ഊറ്റം കൊള്ളുമ്പോൾ അത് കേവലം മുദ്രാവാക്യത്തിൽ മാത്രം ഒതുങ്ങുന്നതല്ല എന്ന് മനസ്സിലാക്കണം... ഭാരതം ബാഹ്യ ആക്രമണങ്ങളെ നേരിടാൻ സുസജ്ജമാണെന്ന് പറയുമ്പോൾ രോമ കൂപങ്ങൾ എഴുനേറ്റു നിന്നിട്ട് കാര്യമില്ല.. സുസ്സജ്ജമാജ സൈന്യവും,, ശക്തമായ ഭരണ നേതൃത്വവും ഈ രാജ്യത്ത് നിലനിൽക്കുന്നു എന്നത് കൂടിയാണ് 'സുസജ്ജമായ രാജ്യം' എന്നത് കൊണ്ട് ഉദ്ദേശിക്കുന്നത്... ബാഹ്യമായ ആക്രമണഭീഷണികളെ തളരാതെ നേരിടുമെന്നും തിരിച്ചടിക്കുമെന്നും ഇവിടെ ഓരോ പൗരനും വിശ്വസിക്കുന്നു...

     രാജ്യം വർഷങ്ങൾക്കു മുൻപ് നേരിട്ട് യുദ്ധത്തിൽ നേരിടേണ്ടി വന്ന രാഷ്ട്രമാണ് പാകിസ്ഥാൻ എന്ന് ഇവിടെ പലരും മറന്നു പോകുന്നു.. പാകിസ്ഥാൻ നേതൃത്വം കൊടുത്തു നടത്തിയ ഭീകര ആക്രമണങ്ങളിലാണ് ഇവിടെ പട്ടാളക്കാരും,, സാധാരണ ജനവും ഉൾപ്പെടുന്ന അനേകം ജീവിതങ്ങൾ ഇല്ലാതായതെന്ന് പലരും മറക്കുന്നു... ഭാരത സൈനീയകരുടെ ശരീര അവയവങ്ങൾ ഛേദിച്ചുവരെ തിരികെ ലഭിച്ച ശവശരീരങ്ങളെ പലരും മറക്കുന്നു... അവിടെയെല്ലാം സമാധാനം മുറുകെപ്പിടിച്ച ഭാരതം എന്ന രാജ്യത്തേയും ഇവിടെ പലരും മറക്കുന്നു... ഈ പ്രത്യാഘാതങ്ങൾ നേരിടേണ്ടി വന്ന അവസ്സരങ്ങളിൽ രാജ്യം ഭരിച്ചവരെ മാത്രം നമ്മൾ ചർച്ചകളിൽ ഓർക്കുന്നു.. ഏതൊരു രാഷ്ട്രീയകക്ഷി ഭരിച്ചാലും രാജ്യം 'ഭാരതം' മാത്രമാണെന്ന സത്യത്തെയും മറക്കുന്നു....

     രാജ്യം 'സമാധാനം' എന്ന വർണ്ണക്കടലാസ്സിൽ പൊതിഞ്ഞ മിഠായി വിതരണം ചെയ്‌താൽ സമാധാനം ഉണ്ടാകും എന്ന് കരുതുന്നത് എന്തുതരം വിവേകമാണ്...!?? പാകിസ്ഥാൻ നേരിട്ട് നടത്തിയ യുദ്ധത്തിലും,, കാർഗിൽ യുദ്ധം എന്ന ഒളിപ്പോർ നടത്തിയതിലും,, തീവ്രവാദികളാൽ നടത്തിയ വിശുദ്ധ യുദ്ധത്തിലും, ആക്രമണങ്ങളിലും ഭാരതത്തിനു നഷ്ടപ്പെട്ടത് ജീവനും, സ്വത്തും, മാത്രമാണ്... സുരക്ഷിത രാഷ്ട്രമല്ലെന്ന പേരുദോഷത്തിന് ഉത്തരം പറയേണ്ട ബാധ്യത ലോക ജനതയ്ക്കു മുൻപിൽ വേറെയും.. ഇവിടെയെല്ലാം ആക്രമണങ്ങളുടെ നേട്ടം ഉണ്ടാക്കിയത് പാകിസ്ഥാനാണ്... നേരിട്ടുള്ള യുദ്ധപരാജയം ഒഴികെ... അവിടെയും ഇഴകീറി പരിശോധിച്ചാൽ തിരികെ ചിന്തിക്കേണ്ടി വരും... നമ്മുടെ രാജ്യത്തിൽ സമാധാനം ഇല്ലാതാക്കിയതിൽക്കൂടി,, ഓരോ അക്രമണങ്ങളിലും,, പട്ടാളക്കാരുടെ ഉൾപ്പെടെ ജീവൻ അപഹരിച്ചതിൽക്കൂടി,, നമ്മുടെ രാജ്യത്തിന്റെ സമ്പത്ത് നശിപ്പിച്ചതിൽക്കൂടി,, നമ്മുടെ രാജ്യത്തിന്റെ പ്രതിച്ഛായ നശിപ്പിച്ചതിൽക്കൂടി,, നമ്മുടെ ജനതയെ സംഘർഷത്തിൽ ആക്കിയതിൽക്കൂടി,, രാജ്യത്തിനകത്തുള്ള വിധ്വംസ്സക ശക്തികൾക്ക് പ്രചോദനവും, ശക്തിയും പകർന്നതിൽക്കൂട്ടി, അങ്ങനെ പലരീതിയിലും നമ്മുടെ രാജ്യത്തിന്റെ സമാധാനപൂർണ്ണമായ മുന്നേറ്റത്തിന് പാകിസ്ഥാൻ വിലങ്ങുതടി ആകാൻ തുടങ്ങിയിട്ട് ആ രാജ്യത്തിന്റെ ആരംഭകാലത്തോളം പഴക്കമുണ്ട്...

     നിശ്ചിത ഇടവേളകളിൽ ഉണ്ടാകുന്ന ജീവനുകളുടെ  നഷ്ടങ്ങളെ അപലപിച്ചും,, നാശ നഷ്ടങ്ങളെ മറന്നുമുള്ള;; ശക്തമായ രാഷ്ട്രം,, അഞ്ചാം സൈനീക ശക്തി,, അണ്വായുധ ശക്തി,, സാമ്പത്തിക ശക്തി എന്നൊക്കെയുള്ള ഗീർവാണങ്ങളെ ആർക്കും മനസ്സിലാക്കാൻ കഴിയുന്നില്ല...  മൂന്നുലക്ഷം കോടി രൂപ പ്രതിരോധത്തിന് വാർഷിക ബഡ്ജറ്റിൽ അനുവദിച്ചു ജീവിക്കുന്ന ഒരു ജനതയ്ക്ക് എല്ലാ നഷ്ട്ടങ്ങൾക്കു ശേഷമുള്ള സമാധാന ചർച്ചയുടെ സുരക്ഷിതത്വം മാത്രം മതിയോ?? അതോ ഇത്രയും തുക പൊതു ഖജനാവിൽ നിന്നും മുടക്കുന്നത് അപലപിക്കലുകളുടെയും,, സമാധാന ചർച്ചകളുടെയും മാത്രം ചെലവാണോ?? ഇത്രയും കാലം ഭരിച്ച സകല ഭരണ കർത്താക്കളും മറുപടി പറയണം... 

     പുൽവാമയിലെ ഭീകര ആക്രമണം അവസ്സാനത്തെത് എന്ന് കരുതുന്ന വിഡ്ഢികൾ ഭാരതത്തിൽ ജീവിക്കുന്നത് അതിശയമാണ്..  മുംബൈ ഭീകര ആക്രമണം അവസ്സാനത്തേത് എന്ന് കരുതിയത് പോലെ ഒരു വിഡ്ഢിത്വം... സ്വയം ചാകാൻ വരുന്നവന് അവൻ ഉദ്ദേശിച്ചതിലും അപ്പുറമുള്ള നാശനഷ്ടം നമുക്കു വരുത്തിയതിനുശേഷം അവന്റെ ജീവിതം നീട്ടി നൽകി വിചാരണ നടത്തി കഴുവേറ്റുന്നതിൽ എന്ത് പ്രശ്നപരിഹാരമാണ് ഉണ്ടാകുന്നത്..!?? ആക്രമണസമയം മരിക്കാൻ തയ്യാറായവന് ജീവിതം നീട്ടി നൽകി ഇവിടുത്തെ വിധ്വംസ്സക ശക്തികൾക്ക് രാഷ്ട്രീയ വിനിമയ ഉപാധിയാകുന്നതിനു കൂടികാരണമായ ശേഷം മരിക്കാൻ കഴിയുന്ന  ഇരട്ടി നേട്ടമാണ് പിടിക്കപ്പെടുന്ന തീവ്രവാദിക്ക് ഉണ്ടാകുന്നത്... 

     യുദ്ധം ഒരു ജനതയെയും വിജയിപ്പിച്ചിട്ടില്ല എന്നതു മാത്രമല്ല ഒരു രക്തരൂക്ഷിത വിപ്ലവവും ആരെയും ആത്യന്തികമായി വിജയിപ്പിച്ചിട്ടില്ല എന്നതും സത്യമാണ്... പക്ഷെ ലോകം കണ്ട പല വിപ്ലവങ്ങളും അനന്തര കാലഘട്ടങ്ങളിൽ പ്രകീർത്തിക്കപ്പെട്ടിട്ടുണ്ട്... ആ വിപ്ലവങ്ങളെ പ്രചോദന ശക്തിയായിക്കണ്ട് പ്രവർത്തിക്കുന്നവർ ഇന്ന് സംഘർഷങ്ങളെ തള്ളിപ്പറഞ്ഞു കാണുമ്പോൾ സംശയമാണ് ഉയരുന്നത്... അനിവാര്യതയുടെ അവസ്സാനഘട്ടത്തിൽ മാത്രമേ യുദ്ധങ്ങൾ സംഭവിക്കാവൂ.. യുദ്ധങ്ങൾ ഒഴിവാക്കുക എന്നത് അതിനു കാരണഭൂതരാകുന്ന എല്ലാവരുടെയും ഉത്തരവാദിത്വമാണ്... കാരണം ആരും യുദ്ധത്തിൽനിന്നും പരിപൂർണ്ണമായും നേടില്ല... എന്നാൽ യുദ്ധത്തെ ക്ഷണിച്ചു വരുത്തുന്നവർക്ക് എല്ലാം നഷ്ട്ടപെടുകയും,, മറ്റൊരുവർക്ക് ഉയർന്നു നിന്ന ഒരു സംഘർഷ വിഷയത്തിന് പരിഹാരം കാണാൻ കഴിയുകയും ചെയ്ത ചരിത്രവും യുദ്ധത്തിനുണ്ടെന്ന് എല്ലാവരും കാണണം... 

     നിലവിലെ ഭാരതത്തിന്റെ അന്തരീക്ഷത്തിലേക്ക് വരൂ... ഒരു യുദ്ധത്തെ ആരുംതന്നെ സ്വാഗതം ചെയ്യുന്നില്ല... യുദ്ധത്തിൽ ഏർപ്പെടുന്ന രാജ്യത്തിന് ഉണ്ടാകുന്ന നഷ്ട്ടം സൈനികരുടെ ജീവനും,, സമ്പത്തും മാത്രമല്ല... യുദ്ധത്തിന്റെ തീവ്രതയിൽ നിൽക്കുന്ന രാജ്യം മറ്റുപല രാജ്യങ്ങളുടെയും സഹായം അനിവാര്യമായി സ്വീകരിക്കേണ്ടിവരും... അത് സാങ്കേതികവും, സാമ്പത്തികവും,, ആശയപരവും,, രാഷ്ട്രീയപരവും,, വ്യവസായികപരവും;;  അങ്ങനെ പലവിധത്തിലും സമവായങ്ങളിൽ എത്താൻ രാജ്യം നിർബന്ധിതമാകും... കാരണം യുദ്ധത്തിലെ വിജയമാണ് പ്രധാനം... ശത്രു രാജ്യത്തെ സഹായിക്കുന്നതിനോ,, സഹായിക്കാതിരിക്കാനോ നമ്മൾ വിട്ടു വീഴ്ചകൾക്ക് തയ്യാറാകേണ്ടി വരും... കാരണം സുസജ്ജമായ സാമ്പത്തിക- സൈനീക രാഷ്ട്രമായ അമേരിക്ക യുദ്ധത്തിനിറങ്ങുന്ന അവസ്ഥയല്ല നമുക്കുള്ളത്... നമ്മൾ ഇന്നും അവികസിത രാജ്യം എന്ന ലേബലിൽ നിലകൊള്ളുന്ന ഒരു രാജ്യമാണ്... ""നമ്മൾ കരുത്തരാണ്... പക്ഷെ കരുത്ത് പരീക്ഷിക്കാൻ അവസ്സരം ഉണ്ടാക്കരുത്"" എന്നത് രാഷ്ട്ര മീമാംസയിലെ ഒരു ഉപദേശം മാത്രം....

     ഇപ്രകാരം ഒരു യുദ്ധത്തിന്റെ കെടുതികളുടെ സകല വശങ്ങളും തിരിച്ചറിവുള്ള ഭാരതജനത എന്തു കൊണ്ടായിരിക്കും പാകിസ്ഥാനെതിരെയുള്ള ഒരു പ്രത്യാക്രമണത്തെ സ്വാഗതം ചെയ്യുന്നത്?? കാരണം ഭാരത ജനതയുടെ മുൻകാല ചരിത്രത്തെ പഠിച്ചാൽ മനസ്സിലാകും... പാരതന്ത്യ്രത്തെ ഒരൽപ്പം പോലും ഉൾക്കൊള്ളാൻ വിസ്സമ്മതിച്ച പൂർവ്വികരായിരുന്നു നമുക്കുണ്ടായിരുന്നത്.. അവർ ബ്രിട്ടീഷ് ജനതക്കെതിരെ സംഘർഷത്തിന് മുതിർന്നത് ഇന്ന് തള്ളിപ്പറയുന്നവർ ഉണ്ടോ എന്ന് ആരായാണം... അവർ മുന്നോട്ടു വന്ന് നമ്മുടെ പൂർവ്വികരെ പരസ്യമായി തള്ളിപ്പറയണം... അവർക്കു മാത്രമേ അഭിമാനത്തെ പണയം വെയ്ക്കുന്ന അവസ്ഥയിലും സംഘർഷത്തെ തള്ളിപ്പറയാൻ കഴിയൂ... സംഘർഷം രാജ്യത്തിന്റെ സാഭിമാനത്തിനും,, സുരക്ഷക്കും വിഘാതമാകുമ്പോൾ സ്വീകരിക്കുന്നതിൽ ചരിത്രം ഇന്നുവരെ തെറ്റ് കണ്ടിട്ടില്ല... മറിച്ചു അപ്പോഴും സമവായം പറയുന്നവനോടെ മാത്രമേ കണ്ടിട്ടുള്ളു.. 

     ഒരു സ്വേച്ചാതിപത്യ രാഷ്ട്രം സംഘർഷത്തിലേക്ക് പോകുന്നതുപോലെ ഒരു ജനാധിപത്യ രാജ്യത്തിന് പോകാൻ കഴിയില്ല... അവിടെ സകലമായ ജനങ്ങളുടെയും വിശ്വാസ്യത അനിവാര്യമാണ്... തീവ്രവാദ കേന്ദ്രങ്ങൾ ആക്രമിക്കുന്നതിൽ സന്തോഷം അനുഭവിക്കുന്ന ജനതയാണ് ഇവിടെയുള്ളത്... കാരണം നിരന്തരമായ ബാഹ്യ ആക്രമണങ്ങളിലും, അതിൽ പൊലിയുന്ന ജീവിതങ്ങളിലും പൊതുജനം വ്യാകുലപ്പെടുന്നു.. അവർ അതിൽ അസ്വസ്ഥരാണ്... തീവ്രവാദികളെ വെച്ചുപുലർത്തുന്നത് നമുക്കോരോരുത്തർക്കും ഭീഷണിയാണെന്ന് ഈ രാജ്യം മനസ്സിലാക്കുന്നു...

     ഈ രാജ്യം നമ്മുടെ ശത്രുക്കൾക്കെതിരെ ആക്രമണം നടത്താൻ മുതിരുമ്പോൾ ഏറ്റവും എതിർ ശക്തിയായി നിൽക്കുന്നത് രാജ്യത്തിനുള്ളിൽ ഉള്ളവരാണെന്നതാണ് ഏറ്റവും വലിയ പ്രതിസന്ധി... അവരും പല വിധത്തിലുണ്ട്... രാജ്യത്തിന്റെ പൊതു താൽപ്പര്യം കണക്കാക്കി രാജ്യം പ്രതിയാക്രമണം നടത്തുമ്പോൾ അതിന്റെ മേന്മ ഭരണകൂടം കൊണ്ടുപോകുമോ എന്ന ഭീതി എതിർപക്ഷ രാഷ്ട്രീയക്കാരെ ഭരിക്കുന്നു.... അവർ വ്യാകുലത പൂണ്ടു നടത്തുന്ന പ്രവർത്തനങ്ങൾ ശത്രുപക്ഷത്തിന് ഗുണം ചെയ്യും എന്നു മനസ്സിലാക്കിയിട്ടും അവർ അപ്രകാരം തന്നെ പ്രവർത്തിക്കുന്നു എന്നതാണ് ആശങ്കാജനകം... രാഷ്ട്രീയ നേട്ടത്തിനായി ഇവിടുത്തെ ഇസ്ളാമിക സമൂഹത്തെ തെറ്റിദ്ധരിപ്പിച്ചു കൂടെ നിർത്താനും പ്രതിപക്ഷ രാഷ്ട്രീയ പാർട്ടികൾ ശ്രമിക്കുന്നു എന്നത് രാജ്യത്തിന്റെ നിലനിൽപ്പിന് ഭീഷണിയാണ്... അതിർത്തിയിൽ മരിക്കുന്ന ഭീകരൻ നിങ്ങൾക്കുകൂടി വേണ്ടിയാണ് മരിച്ചത് എന്ന് ഇസ്ളാമിക സമൂഹത്തിനിടയിൽ പ്രചാരണം നടത്താൻ ഇവിടെ ചിലർ കഷ്ടപ്പെടുന്നുണ്ടോ എന്നു കൂടി നമ്മൾ ചിന്തിക്കണം...

     യുദ്ധം ഒഴിവാക്കപ്പെടേണ്ടതാണ്... ആരംഭ നിമിഷം വരെ.. ഒരു ജനത അതിനു തയ്യാറെടുത്താൽ അതിന്റെ അർഥം യുദ്ധത്തിനു കാരണമായ വിഷയത്തെ ഇനിമേൽ ഞങ്ങൾക്ക് അനുവദിക്കാൻ കഴിയില്ല എന്നും,, അതിന്റെ പ്രത്യാഖാതങ്ങൾ സഹിക്കാൻ ഞങ്ങൾ തയ്യാറാണ് എന്നുമാണ്.. അത് സഹനത്തിന്റെ അവസ്സാന വാക്കാണ്... അല്ലാതെ തങ്ങൾക്കുവേണ്ടി പൊരുതുന്ന സൈനികരെ ബലിനൽകി നേടുന്ന സുഖം എന്നല്ല.. യുദ്ധത്തിന് തയ്യാറാകുന്നത് രാജ്യമാണ്.... സൈന്യം മാത്രമല്ല... ഈ തിരിച്ചറിവുള്ളവർ യുദ്ധം വിജയിച്ചു തന്നെ വരും.. നമ്മുടെ രാജ്യം നമുക്ക് ഒരു നഷ്ട്ടവുമില്ലാതെ ശത്രുവിനെ ഇല്ലായ്‌മചെയ്യും... തീർച്ച...

[Rajesh Puliyanethu
 Advocate, Haripad]

മാധ്യമ രംഗം ഇരുപത്തി അഞ്ചു വർഷങ്ങളിലെ മാറ്റം....!!!??

'ഏഷ്യാനെറ്റ്' എന്ന ആദ്യ സ്വകാര്യ മലയാളം ചാനൽ അവരുടെ ഇരുപത്തി അഞ്ചാം വാർഷികം ആഘോഷിക്കുകയാണ്... 

സ്വകാര്യ മലയാളം ചാനലുകളുടെ പ്രവർത്തനകാലം 'ഏഷ്യാനെറ്റ്' ന്റെ പിറവികാലത്തെ അടിസ്ഥാന മാനദണ്ഡമായി എടുത്തു പറഞ്ഞാൽ....

ഇരുപത്തി അഞ്ച് വർഷങ്ങൾക്കു മുൻപ് 'പത്രഭാഷ' എന്നത് ഉന്നതമായ ഭാഷാപ്രയോഗത്തിന്റെ വിളിപ്പേരായിരുന്നു.... 'അച്ചടി ഭാഷ' എന്നു വിളിച്ചും അപ്രകാരമുള്ള ഭാഷാ പ്രയോഗത്തെ പൊതു സമൂഹം പ്രകീർത്തിച്ചിരുന്നു... പത്ര ഭാഷ ഒരിക്കലും സാഹിത്യത്തിന്റെ ഉന്നത പ്രദർശനം നടത്തിയിരുന്നില്ല.. എന്നാൽ അത് ലളിതവും,, മാന്യവും ആയിരുന്നു.... 'വടുവൊത്ത ഭാഷ,, ചതുര ഭാഷ' എന്നിങ്ങനെയും വിശേഷണങ്ങൾ അനവധി ഉണ്ടായിരുന്നു.... വിശേഷിപ്പിക്കുന്നവർ 'പത്ര ഭാഷ' എന്ന സംസ്കാര സമ്പന്നമായ പ്രയോഗരീതിയെക്കുറിച്ച് ബഹുമാനം സൂക്ഷിച്ചു മാത്രം ചിന്തിക്കുകയും, സംസാരിക്കുകയും ചെയ്തിരുന്നു...

ഇന്ന് ദൃശ്യ-മാധ്യമ ഭാഷക്ക് മുൻപ് പറഞ്ഞ വിധമായ മേന്മയില്ല... നാടൻ സംസാര ശൈലികൾ ദൃശ്യ മാധ്യമങ്ങൾ കടം കൊള്ളുകയും അച്ചടി മാധ്യമങ്ങൾ അതേ വഴി പിന്തുടരുകയും ചെയ്തതോടെ  ദൃശ്യ മാധ്യമ ഭാഷ അടിസ്ഥാന പത്ര ഭാഷയിൽ നിന്നും ഒരുപാട് വേറിട്ടു നിൽക്കുന്നു...അത് ഈ മേഘലയിലെ ച്യുതിയായിത്തന്നെ ചൂണ്ടിക്കാണിക്കപ്പെടണം...  പത്ര മാധ്യമ രംഗത്തെ ച്യുതിക്ക്‌ കാരണം സ്വകാര്യ വ്യക്തികൾ നടത്തുന്ന മാധ്യമ പ്രവർത്തനങ്ങൾ കാരണമാണ് എന്നും പറയുക വയ്യ... കേരളചരിത്രത്തിൽ മാത്രം നൂറ്റാണ്ടുകളായി പത്ര പ്രവർത്തനം നടത്തി വരുന്ന സ്വകാര്യ സംരംഭകർ എത്രയോ ഉണ്ട്.... രാഷ്ട്രീയ, സാംസ്കാരിക, മത, സാമുദായിക വിഷയങ്ങളിൽ അവർ പക്ഷപാതങ്ങൾ കാണിച്ചിരുന്നു എങ്കിലും അവരുടെ ഭാഷ മാന്യമായിരുന്നു... നിലപാടുകളിലെ ചായ്‌വ് പൊതുജനം തിരിച്ചറിയാതെ സൂക്ഷിക്കാനുള്ള ഒരു ശ്രമമെങ്കിലും നടത്തിയിരുന്നു... ആ ശ്രമവും പൊതുജനത്തെ വില കല്പിയ്ക്കുന്നതിന്റെ ഭാഗമായി കരുതുവാൻ കഴിയുമായിരുന്നു.. 

മുൻപ് പത്ര മാധ്യമങ്ങൾ ആക്ഷേപ ഹാസ്യത്തെ മനോഹരമായി കൈകാര്യം ചെയ്തിരുന്നു... കാർട്ടൂണുകൾ ഉൾപ്പെടെയുള്ള ആക്ഷേപ ഹാസ്യരീതികളെ മികച്ച കലാരൂപങ്ങളായിക്കൂടി കണ്ട് ബഹുമാനിച്ചിരുന്നു.... വിമർശനം ഏറ്റു വാങ്ങുന്നവരും അതിന്റെ സൃഷ്ട്ടാവിനെ ബഹുമാനിച്ചിരുന്നു.. ആ കലയെ അംഗീകരിച്ചിരുന്നു... ആ അംഗീകാരം പൊതു സമൂഹത്തിന്റേതു കൂടി ആയിരുന്നു.... കാരണം ആ വിമർശനങ്ങൾ ഭാഷയുടെ സീമകളെ ലംഘിച്ചിരുന്നില്ല... പ്രതിപക്ഷ ബഹുമാനം എന്ന ജനാധിപത്യ മാനദണ്ഡം ലംഘിച്ചവർ തുലോം കുറവായിരുന്നു... 

മാധ്യമ സംസ്കാരത്തിലെ "സംസ്ക്കാരം" എന്ന വാക്ക് എടുത്തുമാറ്റി പ്രവർത്തിക്കുന്നവരാണ് ഇന്നത്തെ ദൃശ്യമാധ്യമ പ്രവർത്തകർ എന്ന് പറയാതെ വയ്യ... ''വാർത്ത വിൽപ്പന ചരക്ക്'' എന്ന അധഃപതിച്ച ചിന്തയിലേക്ക് എത്തിച്ചവർ ദൃശ്യമാധ്യമ പ്രവർത്തകർ ആണെന്ന് കാണേണ്ടിവരുന്നു... മുൻപ് ഒരു അധികാര സ്ഥാനത്ത് ഉള്ള ഒരുവനെ,, അല്ലെങ്കിൽ ഒരു പൊതു പ്രവർത്തകനെ,, കലാ- സാംസ്കാരിക പ്രവർത്തകരെ;; അപ്രകാരം സമൂഹം അംഗീകരിക്കുന്ന-  ബഹുമാനിക്കുന്ന പല വിധ മേഖലയിൽ പ്രവർത്തിക്കുന്നവരെ മാധ്യമങ്ങൾ നേരിട്ടിരുന്ന ഒരു രീതി ഉണ്ടായിരുന്നു.... എത്ര വലിയ പ്രതിയോഗിയെയും നിലം പരിശാക്കുകയും ഒപ്പം പ്രതിപക്ഷ ബഹുമാനം സൂക്ഷിക്കുകയും ചെയ്യുന്ന ഒരു നല്ല രസതന്ത്രം അവിടെയെല്ലാം പ്രവർത്തനത്തിൽ ഉണ്ടായിരുന്നു... 

മഹാരഥന്മാരിൽ നിന്നും തുടങ്ങി വെച്ച, രാജ്യസ്നേഹത്തിൽ വേരുറപ്പിച്ചു വളർന്ന,, ആത്മാഭിമാനത്തെ ജ്വലിപ്പിച്ചു മുന്നേറിയ പത്ര സംസ്ക്കാരം ഇവിടെ മരിച്ചു പോയി എന്നു തന്നെ പറയാം.... ഇവിടെ ഏതൊരുവനെതിരെയും ആക്രോശിക്കാൻ മാത്രം ശീലിച്ച,, തങ്ങൾ മാത്രമാണ് എന്തിന്റെയും, ഏതിന്റെയും നിർണ്ണയ ശക്തി എന്ന് അഹങ്കരിക്കുന്ന, ഒരു പത്ര സ്ഥാപനം ജോലി നൽകാൻ കാരണമായ ഒരു ഡിഗ്രിയോ, ഡിപ്ലോമയോ ലോകത്തെ മുഴുവൻ നിയന്ത്രിക്കാനും, നിർണ്ണയിക്കാനുമുള്ള അധികാര പത്രികയായി കരുതുകയും ചെയ്യുന്ന ഒരു വിഭാഗം മാധ്യമ ജീവികൾ ഈ മേഘലയുടെ എല്ലാ മഹനീയതയും നശിപ്പിച്ചു എന്നതാണ് സത്യം... സ്വന്തം രാഷ്ട്രീയത്തെയും, മതത്തേയും,, താല്പര്യങ്ങളെയും ഏറ്റവും ഉയർന്ന വിലക്ക് വിൽക്കുവാനുള്ള ഒരുവിനിമയ മേഖല മാത്രമായി പത്ര പ്രവർത്തന രംഗം അധഃ പതിച്ചു... 

സ്വന്തം മതവും,, രാഷ്ട്രീയവും പൊതുജന ശ്രദ്ധ അധികമാകർഷിക്കാത്തവിധം ഒളിച്ചു കടത്തിയിരുന്ന മനോരമയുടെയും, മാതൃഭൂമിയുടെയും പത്ര രീതികൾ തങ്ങളുടെ രാഷ്ട്രീയവും,, മതവും,, നിലപാടുകളും, വെല്ലുവിളിച്ചു കടത്തിയിരുന്ന ദേശാഭിമാനിക്കും,, ജന്മഭൂമിക്കും,, ചന്ദ്രികയ്ക്കും സമാനമായി മാറി... ഒരു വാർത്ത ""ഏത് മാധ്യമത്തിലാണ് പ്രസിദ്ധീകരിക്കപ്പെട്ടത്"" എന്ന പ്രസക്തചോദ്യത്തിന് ഉത്തരം കണ്ടതിനു ശേഷം മാത്രം ആ വാർത്തയുടെ ആഴവും, പരപ്പും,, പ്രാധാന്യവും വിലയിരുത്തേണ്ട ഉത്തരവാദിത്വം വീക്ഷകന്‌ ഉണ്ടായി...  വാർത്തകൾ റിപ്പോർട്ട് ചെയ്യുക എന്ന വലിയ ജോലിക്കപ്പുറം 'നിലപാടുകൾ' സ്വീകരിക്കുക എന്ന അധിക ഉത്തരവാദിത്വം ഏറ്റെടുത്തതോടെ ദൃശ്യ- പത്ര മാധ്യമ രംഗം മലീമസ്സമായി... 

 " അമ്മയെ തല്ലിയാലും രണ്ടു പക്ഷമുണ്ടെന്ന്" മുൻകാലങ്ങളിൽ പരിഹാസത്തോടും, ആശ്ചര്യത്തോടും ജനങ്ങൾ പറഞ്ഞിരുന്നതാണെങ്കിൽ അമ്മയെ തല്ലുന്നതിലെ ന്യായവും,, അന്യായവും പത്രക്കാർ അന്തിചർച്ച നടത്തി പറഞ്ഞു മനസ്സിലാക്കിക്കൊടുത്തു... ഈ ചർച്ചകളിൽ ലയിച്ച പ്രേക്ഷകരിൽ ഒരു വിഭാഗം "അത്യാവശ്യ ഘട്ടങ്ങളിൽ അമ്മയും തല്ലുകൊള്ളാൻ യോഗ്യയാണ്"" എന്ന നിഗമനത്തിൽ കളം വിട്ടു... കഴിഞ്ഞ ഇരുപത്തി അഞ്ചു വർഷങ്ങൾക്കു മുൻപ് ഇവിടെ അമ്മയെ തല്ലുന്നത് "തെറ്റ്" മാത്രമായിരുന്നു... 

സമൂഹത്തിൽ ഉയർന്നു വരുന്ന ഏതൊരു വിഷയത്തിന്റെയും പ്രാധാന്യം ഇല്ലാതാക്കുന്നത് ദൃശ്യ- പത്ര മാധ്യമങ്ങളാണ്.. സമൂഹം ഒറ്റ ശബ്ദമായി നിലകൊള്ളേണ്ട വിഷയങ്ങളെ അവർ സമൂഹം രണ്ടായി നിന്നു തർക്കിക്കേണ്ട വിഷയങ്ങളാക്കി മാറ്റുന്നു... ഈ പ്രവർത്തി സമൂഹത്തിന് തർക്കങ്ങളിലൂടെയും,, ചർച്ചകളിൽക്കൂടിയും നിഗമനങ്ങളിൽ എത്തിച്ചേരാനുള്ള കഴിവിനെയാണ് വർദ്ധിപ്പിക്കുന്നത് എന്നവർ പ്രചരിപ്പിക്കുകയും ചെയ്യുന്നു... യഥാർഥത്തിൽ ചർച്ചകളുടെ കോലാഹലങ്ങളിൽ ഒരുപാട് താൽപ്പര്യങ്ങളെ ഇക്കൂട്ടർ ഒളിച്ചു കടത്തുന്നു... അതിർത്തിയിൽ ഭീകരർ കടന്നു കയറുമ്പോൾ പാകിസ്ഥാൻ പട്ടാളം കവറിങ് ഫയർ നടത്താറുണ്ട് എന്ന് കേട്ടിട്ടുണ്ട്... ഇവിടെ തങ്ങളുടെ താൽപ്പര്യങ്ങളെ ഒളിച്ചു കടത്തുന്നതിനുള്ള കവറിങ് ഫയറാണ് മാധ്യമങ്ങൾ സംഘടിപ്പിക്കുന്ന പല ചർച്ചകളും....

ഇരുപത്തി അഞ്ചു വർഷങ്ങൾക്കു മുൻപ് ഇവിടെ രാജ്യ താൽപ്പര്യങ്ങൾക്ക് എതിരായി നിൽക്കുന്ന ഒന്നും രണ്ടായി നിന്ന് ചർച്ച ചെയ്യപ്പെടുമായിരുന്നില്ല... അതിനു താല്പര്യമുണ്ടായിരുന്നവരും അതിനുള്ള ധൈര്യം കാണിച്ചിരുന്നില്ല... ഇന്ന് രാജ്യത്തിനെതിരെ പ്രത്യക്ഷ ആക്രമണം നടത്തുന്നവനു വേണ്ടിയും സ്വതന്ത്ര ചർച്ചകൾ സംഘടിപ്പിക്കപ്പെടുന്നു... രാജ്യത്തിനെതിരെ പ്രത്യക്ഷ ആക്രമണം നടത്തുന്നവൻ ഒറ്റപ്പെടേണ്ടവനാണെന്നുള്ള സാമൂഹ്യ ബോധത്തിനാണ് ഈ ചർച്ചകൾ തുരങ്കം വെയ്ക്കുന്നത്... അങ്ങനെ പലതും.... മുൻപു പറഞ്ഞതു പോലെ  "അത്യാവശ്യ ഘട്ടങ്ങളിൽ അമ്മയും തല്ലുകൊള്ളാൻ യോഗ്യയാണ്" എന്ന നിഗമനത്തിൽ എത്തുന്നതു പോലെ ഒരു വിഭാഗം രാജ്യത്തിനെതിരെ പ്രത്യക്ഷ ആക്രമണം നടത്തുന്നവനും അവന്റേതായ ന്യായീകരണങ്ങൾ ഉണ്ടെന്നും അവയും സംരക്ഷിക്കപ്പെടേണ്ടതാണ് എന്നുമുള്ള നിഗമനങ്ങളിൽ എത്തിച്ചേരുന്നു... തീർച്ചയായും ഇപ്രാകാരമുള്ള മാധ്യമ പ്രവർത്തനം രാജ്യത്തിന്റെ സുരക്ഷയേയും കെട്ടുറപ്പിനെയും ബാധിക്കും എന്ന കാര്യത്തിൽ യാതൊരു തർക്കവും വേണ്ട...രാജ്യത്തിനെതിരെ യുദ്ധം ചെയ്യുന്നവന് ആശയപരമായി ആളെക്കൂട്ടുന്നതിന് ഈ മാധ്യമ പ്രവർത്തനം വഴി വെയ്ക്കുന്നു... 

ഇരുപത്തി അഞ്ചു വർഷങ്ങൾക്കു മുൻപ് വിമർശന സ്വാതന്ത്ര്യത്തെ ഇത്രയധികം മ്ലേശ്ചമായി കൈകാര്യം ചെയ്യുന്ന ഒരു മാധ്യമ രീതി ഉണ്ടായിരുന്നില്ല... വിമർശിക്കാനും,, പരിഹസ്സിക്കാനും ഉള്ള സ്വാതന്ത്ര്യവും അവകാശവും മാനിച്ചു കൊണ്ടു തന്നെ പറയട്ടെ... നിന്റെ സ്വാതന്ത്യം എന്റെ മൂക്കിൻ തുമ്പിൽ അവസ്സാനിക്കുന്നു എന്ന അവകാശവും കാണണം... റേറ്റിങ്ങ് കൂട്ടുവാനും,, ആൾക്കാരെ ആകർഷിക്കാനും എത്ര തരം താണ പദ പ്രയോഗങ്ങളും നടത്താൻ മാധ്യമങ്ങൾ പ്രത്യേകിച്ച് ദൃശ്യ മാധ്യമങ്ങൾ മടിക്കുന്നില്ല... രാഷ്ട്രീയ- സാമൂഹിക- സാംസ്ക്കാരിക- വിദ്യാഭ്യാസ്സ- വ്യവസ്സായ-- കലാ-- ഉദ്യോഗസ്ഥ മേഘലയിലെ;; ആരെയും,, വിമർശിക്കുന്നതിനും,, പ്രവർത്തിയിൽ പോരായ്മയെ പരിഹസിക്കുന്നതിനും അപ്പുറം താണ തരം വാക്കുകൾ കൊണ്ട് അപമാനിക്കാൻ ഒരു മാധ്യമ സ്ഥാപനത്തിന്റെ ശമ്പളം പറ്റുന്നു എന്ന വിലാസത്തിന് ആരധികാരം നല്കി?? വിമർശനത്തിനു മാത്രമാണ് ഇത്രയധികം സ്വാതന്ത്ര്യം അനുവദിച്ചിരിക്കുന്നത്... പരിഹസിക്കാൻ കഴിയുന്നത് മറ്റൊരുവന്റെ പ്രവർത്തിയിലെ പോരായ്മയെയാണ്... ഒരിക്കലും മറ്റൊരുവനെയല്ല... 

ഇരുപത്തി അഞ്ചു വർഷങ്ങൾക്കു മുൻപ് ഒരു മാധ്യമ സ്ഥാപനത്തിലെ അവതാരകൻ സർവ്വ ജനങ്ങൾക്കും നേരേ ""കോപ്പാണ്""" എന്നൊരു പദ പ്രയോഗം നടത്തില്ല... രാജ്യത്തിന്റെ പ്രധാനമന്ത്രിയെ നിരന്തരം പ്രയാണ മന്ത്രി എന്ന് മാത്രം സംബോധന ചെയ്യില്ല... പ്രതിപക്ഷ നേതാവിനെ പൗഡർ കുട്ടപ്പൻ എന്ന് വിളിക്കില്ല... മുതിർന്ന രാഷ്ട്രീയ നേതാവിനെയും,, മുഖ്യമന്ത്രി പദം അലങ്കരിച്ചയാളെയും അച്ചുമാമ എന്ന് പറയില്ല... അങ്ങനെ നിങ്ങൾ അപമാനിക്കുന്ന ഉയർന്ന വ്യക്തിത്വങ്ങൾ എത്ര അധികം!? നിങ്ങൾ പത്ര പ്രവർത്തകർ ഈ സമൂഹത്തിലെ എല്ലാ മനുഷ്യരുടെയും പ്രവർത്തി ദോഷങ്ങളും, പോരായ്മകളും വിളിച്ചു പറയൂ.. അപ്പോഴും നിങ്ങൾ മാന്യരാണെന്നു തെളിയിക്കൂ... നിങ്ങളുടെ പ്രതിപക്ഷ ബഹുമാനം നിറഞ്ഞ വാക്കുകളിലും പ്രവർത്തികളിലും കൂടി...!! തീയേറ്ററിൽ നാലു ടിക്കറ്റ് അധികം വിറ്റുപോകാൻ വേണ്ടി തരം താണ ഡയലോഗ് പറയുന്ന ഇക്കിളി നായകൻറെ റോളല്ല ഒരു മാധ്യമ പ്രവര്ത്തകന് സമൂഹ മധ്യത്തിൽ ഉള്ളത് എന്ന് തിരിച്ചറിയൂ....

ഇരുപത്തി അഞ്ചു വർഷങ്ങൾക്കു മുൻപ് "പറഞ്ഞു നാറ്റിക്കും" എന്ന ഭയപ്പാടോടെയല്ല ഒരു പത്രപ്രവർത്തകനെ പൊതു സമൂഹം നോക്കിക്കണ്ടിരുന്നു... തങ്ങളുടെ കണ്ടെത്തലുകളും നിഗമനങ്ങളും പൊതുജന മധ്യത്തിൽ തുറന്നു വെച്ചു കൊടുക്കുന്നതാണ് മാധ്യമ ധർമം... മാധ്യമങ്ങൾ തുറന്നു കാണിക്കുന്ന വസ്തുതകൾക്ക് അവയുടെ യഥാർഥ നിറം തന്നെ ആയിരിക്കണം... ഇന്ന് അവസ്ഥ മാറിയിരിക്കുന്നു... മാധ്യമങ്ങൾ അവർ താല്പര്യപ്പെടുന്നത് മാത്രമേ കാണുന്നുള്ളൂ... അവർക്കു ലഭിക്കുന്ന വാർത്തകളിലേക്കു അവർ ഇഷ്ട്ടപ്പെടുന്ന നിറങ്ങൾ കലർത്തി പൊതു സമൂഹത്തിനു മുൻപിൽ വിളമ്പുകയും ചെയ്യുന്നു... അതു മാത്രമല്ല, തങ്ങൾ അവതരിപ്പിക്കുന്ന നിറമാണ് യാഥാർത്ഥ നിറം എന്ന് മറ്റെല്ലാവരും വിശ്വസ്സിക്കണം എന്ന് വാശി പിടിക്കുന്നു... അതിനായി ആക്രോശിക്കുന്നു... ആ ആക്രോശങ്ങളിൽക്കൂടി സമൂഹത്തിന്റെ സമസ്ത മേഖലയെയും തങ്ങളുടെ കടിഞ്ഞാണിനുള്ളിലാക്കാൻ ശ്രമിക്കുന്നു.. ആ ശ്രമം ഭരണഘടനാ സ്ഥാപനങ്ങൾക്കു നേരേ വരെ തിരിയുമ്പോൾ സമൂഹം ആശങ്കപ്പെടേണ്ടതുണ്ട്...

സദസ്സിന്റെ ഏറ്റവും പുറകിൽ നിൽക്കുന്ന ആസ്വാദകന് വരെ അനുഭവയോഗ്യമാകാനാണ് നാടകങ്ങളിൽ നമ്മൾ തിരിച്ചറിയുന്ന നാടകീയത കലർത്തിയിരിക്കുന്നത് എന്ന് പറയപ്പെടുന്നു... അതുപോലെ സമൂഹത്തിലെ എല്ലാ വിഭാഗം മനുഷ്യരുടെയും മനസ്സുകളുടെ ശ്രദ്ധ പിടിച്ചെടുക്കാൻ അൽപ്പം നാടകീയത വാർത്തകളിലും കലർത്തുന്നത് മനസ്സിലാക്കാവുന്നതേ ഉള്ളൂ... അതിൽ ഒരു ഏക സ്വഭാവം ഉണ്ട്... എന്നാൽ ഇന്ന് മാധ്യമങ്ങൾ തങ്ങളുടെ താല്പര്യങ്ങൾക്കനുസ്സരിച്ചു ശബ്ദത്തെ ഉയർത്തിയും താഴ്ത്തിയും പറയുന്നു... അടുത്ത കാലത്തു കേട്ട ഒരു തമാശയാണ്;; അറിവിനായി പത്രം വായിക്കുന്നു... ആരോഗ്യത്തിനായി പച്ചക്കറി കഴിക്കുന്നു.. എന്തു ചെയ്യാം രണ്ടിലും വിഷമാണ്...

ഇരുപത്തി അഞ്ചു വർഷങ്ങൾക്കു മുൻപ് വിമർശനത്തിനും, പരിഹാസത്തിനും യുക്തി ഉപയോഗിക്കാതെ വിമർശിക്കാനായി വിമർശിക്കുകയും, പരിഹസിക്കാനായി പരിഹസിക്കുകയും ചെയ്യുന്ന മാധ്യമ പ്രവർത്തനം ഇവിടെ ഉണ്ടായിരുന്നില്ല... ഏതൊരു പ്രവർത്തിയിലേയോ, ആശയത്തിലെയോ മൂല്യമോ, നന്മയോ കാണാതെ വിമർശിക്കുകയും പരിഹസ്സിക്കുകയും ചെയ്യുന്ന ച്യുതി സമൂഹത്തിനെ ദോഷമായി ബാധിച്ചു തുടങ്ങിയിരിക്കുന്നു... പത്രക്കാർ സമൂഹത്തിലേക്ക് കുത്തിവയ്ക്കുന്ന ഈ Psychotropic drugs സമൂഹത്തിലേക്ക് വ്യാപിച്ചു തുടങ്ങിയിരിക്കുന്നു... ഇന്ന് പൊതു സമൂഹത്തിലെ ഏറിയ പങ്ക് ആൾക്കാർക്കും അപഗ്രഥിച്ചു മനസ്സിലാക്കാതെ പരിഹസിക്കാനാണ് താൽപ്പര്യം... വർത്തമാനകാലത്തിൽ മാധ്യമ പ്രവർത്തനം ചരിത്ര കാലത്തും നില നിന്നിരുന്നെങ്കിൽ നമ്മൾ മഹാന്മാർ എന്ന് വിളിച്ചിരുന്ന ഒരു വിഭാഗം ഇവിടെ ഉണ്ടാകുമായിരുന്നില്ല... ഗാന്ധിയോ,, ശ്രീ നാരായണ ഗുരുവോ, പൽപ്പുവോ, അയ്യങ്കാളിയോ,, ബുദ്ധനോ,, ശങ്കരനോ ആരും ഉണ്ടാകുമായിരുന്നില്ല... ഇവർ ആരെങ്കിലും സമൂഹത്തോട് പറഞ്ഞ ആദ്യ വാക്കിനെത്തന്നെ അന്തി ചർച്ച നടത്തി കേവലനായ ഒരു പത്ര പ്രവർത്തകന്റെ ബുദ്ധിയിലും, യുക്തിയിലും ഇട്ട് ഭേദ്യം ചെയ്തു മഥിച്ചു രണ്ടാമതൊരു വാക്കു പറയാൻ ഇവരാരും യോഗ്യരല്ല എന്ന് പ്രഖ്യാപിച്ചു പതിനഞ്ചു നിമിഷത്തെ കൊമേഴ്‌സ്യൽ ബ്രെക്കിന് കട്ട് പറഞ്ഞു എഴുനേറ്റു പോയിട്ടുണ്ടാകും...

മാധ്യമ സ്വാതന്ത്രവും, പ്രവർത്തനവും ഒരു ജനാധിപത്യ സമൂഹത്തിന് ഒഴിച്ചു കൂടാൻ കഴിയാത്തത് ആയതു കൊണ്ടാണ് മലിനമായാലും അതും പേറി നടക്കേണ്ടി വരുന്നത്.. കച്ചവട വൽക്കരിക്കപ്പെടുന്ന മാധ്യമ പ്രവർത്തനത്തെ തിരിച്ചറിയാനുള്ള ബുദ്ധി സമൂഹം ആർജ്ജിക്കണം... അപ്രകാരമുള്ള സമൂഹം കള്ള നാണയങ്ങളെ അവഗണിക്കും.. ആ അവഗണന അവരുടെ നിലനിൽപ്പിനെ ബാധിക്കും.. അത് ശരിയായ പ്രവർത്തനത്തിലേക്ക് അവരെ നയിക്കും.... ജനതക്ക് അർഹതപ്പെട്ടതേ അവർക്കു കിട്ടൂ...

[Rajesh Puliyanethu

 Advocate, Haripad]

"മതിലുകൾ" മനുഷ്യ നിർമ്മിതികൾ...!!!

'മതിലുകൾ' എന്ന വാക്ക് ആർദ്രതയോടെ മലയാളി മനസ്സിൽ വരച്ചിട്ടത് ശ്രീ വൈക്കം മുഹമ്മദ് ബഷീർ ഒരിക്കൽ പോലും തമ്മിൽ കണ്ടിട്ടില്ലാത്ത നാരായണിയെ തീവ്രമായി പ്രണയിക്കുന്നതു കണ്ടിട്ടായിരുന്നു... 

'മതിലുകൾ' മനസ്സുകൾ കൊണ്ട് തീർത്ത് ഒറ്റക്കെട്ടായി നിന്നു പൊരുതി വിദേശ ആധിപത്യത്തിന്റെ ചെങ്കോലും, കിരീടവും കടലാഴങ്ങളിലേക്ക് ചവിട്ടി താഴ്ത്തിയ കഥ ആത്മാഭിമാനത്തിന്റെ ചൂടൻ പാരമ്പര്യമായി ഓരോ വ്യക്തിയുടേയും മനസ്സിലുമുണ്ട്....

'മതിലുകൾ' എന്ന വാക്ക് ചരിത്രത്തിൽ നിന്നും വിസ്മയത്തോടെ നമ്മൾ നോക്കിക്കണ്ടത് ചൈനാ വന്മതിലിനെയായിരുന്നു... സ്വന്തം സാമ്രാജ്യത്തെ പല വിധ ശത്രുക്കളിൽ നിന്നും നുഴഞ്ഞുകയറ്റക്കാരിൽ നിന്നും സംരക്ഷിച്ചു നിർത്താൻ പല കാലഘട്ടത്തിലെ ഭരണാധികാരികൾ നിർമ്മിച്ച ആറായിരത്തിൽപ്പരം കിലോമീറ്ററുകളുടെ ദൈർഘ്യമുള്ള വിസ്മയം....

'മതിലുകൾ' പിന്നീട് സാമൂഹീക ജീവിതത്തിലെ ഇടുങ്ങിയ ചിന്താഗതികളുടെ പ്രതിഫലനമായി വീടുകൾക്കു ചുറ്റും നമ്മൾ തീർത്തു വെച്ചു... ആ മതിലുകൾക്കുള്ളിൽ നാം സുരക്ഷിതരാണെന്ന് ഊറ്റം കൊണ്ടു.... പ്രളയജലം ദന്ത ഗോപുരങ്ങളുടെ മിനാരങ്ങളെ വരെ വിഴുങ്ങിയപ്പോൾ അതിനുള്ളിൽ ജീവനുകൾക്കായി കേണവരെ രക്ഷിക്കാൻ ''മതിലുകൾക്ക് പുറത്തു നിർത്തിയിരുന്നവർക്ക്'' ഉണ്ടായിരുന്ന പ്രധാന തടസ്സവും ഇതേ മതിലുകൾത്തന്നെയായിരുന്നു....

'മതിലുകൾ' നമ്മുടെ സാമൂഹിക ജീവിതത്തെ കൂടുതൽ ഇടുക്കുകയും,, പരസ്പരം വളരെ അധികം അകറ്റുകയും ചെയ്യുന്ന സ്ഥിതിവിശേഷം ഇന്ന് സംജാതമായിരിക്കുന്നു... 'വനിതാ മതിൽ' എന്ന ചിന്ത തന്നെ അതാണ് വിളിച്ചു പറയുന്നത്.... 'നവോഥാനം' എന്ന ചായം പുരട്ടിയാൽ ഈ മതിലിലെ വിള്ളലുകൾ മറയ്ക്കാൻ കഴിയില്ല... പുരുഷന്മാരെ മാറ്റിനിർത്തിയാൽ നവോഥാനം സാധ്യമാണെന്നത് ആരുടെ വികല ചിന്തയിൽ ഉദിച്ചതാണ്!?? ഹിന്ദു സാമുദായിക സംഘടനകളിലെ സ്ത്രീകളെ അണി നിരത്തി മാത്രം എന്തുതരം നവോഥാനമാണ് സാധ്യമാകുന്നത്... 

'മതിലുകൾ' ക്ഷേത്രങ്ങളുടെയും പള്ളികളുടെയും അതിർത്തികളിൽ ഉയർന്നത് ആ മതിൽക്കെട്ടിനുള്ളിൽ പാലിക്കേണ്ട ആചാരങ്ങളെയും, നിയമങ്ങളെയും ഓർമ്മപ്പെടുത്താനാണ്... പൊതു സമൂഹത്തിന് ആപത്കരമായ എന്തെങ്കിലും ആ മതിൽക്കെട്ടിനുള്ളിൽ ഉണ്ടെങ്കിൽ വാതിലുകൾ തള്ളിത്തുറന്നു ചെന്ന് വിശ്വാസികളുടെ ചിന്തയെ സ്വാധീനിച്ചു കൊണ്ട് തിരുത്തണം... മറിച്ചു് ആരാധനാലയങ്ങളുടെ മതിലുകൾ ഇടിച്ചു നിർത്തിക്കൊണ്ടാകരുത്... അത് ഒരിക്കലും നവോഥാനമല്ല... അതിനു ശ്രമിക്കുന്നവർ നവോഥാന നായകരുമല്ല....

'മതിലുകൾ' വനിതകൾക്കു വേണ്ടിയും,, ജാതി സംഘടനകൾക്ക് വേണ്ടിയും മാത്രം പരിമിതപ്പെടുത്തി നിർമ്മിക്കുമ്പോൾ അത് ഒരു പരാജത്തെ മറച്ചു വെയ്ക്കാൻ നിർമ്മിക്കുന്ന കേവലം ഒരു 'മറ' മാത്രമേ ആകുന്നുള്ളൂ... ഇന്നത്തെക്കാലം ആവശ്യപ്പെടുന്നത് ഇടുങ്ങിയ ചിന്താഗതികൾ തീർത്ത മതിലുകൾ പൊളിച്ചെറിയാനാണ്.... കൂടുതൽ മതിലുകൾ നിർമ്മിച്ച് കെട്ടുകളിലേക്ക് ചുരുങ്ങാനല്ല....

[Rajesh Puliyanethu

 Advocate, Haripad] 

യുവതികൾക്ക് മാത്രം സുരക്ഷ നൽകുന്ന ശബരിമല തീർഥാടനം....!!!

     കാലമോ,ഭക്ത സമൂഹമോ മാപ്പുതരാത്ത തെറ്റാണ് ശ്രീ വിജയൻറെ പോലീസ് ശശികല ടീച്ചറോട് ചെയ്തിരിക്കുന്നത്... വൃശ്ചികം ഒന്നാം തീയതി രാവിലെ അയ്യപ്പനെ കണ്ടു നെയ്യഭിഷേകം ചെയ്തു മടങ്ങാൻ വന്ന അമ്പതു വയസ്സ് കഴിഞ്ഞ ഒരു സ്ത്രീയാണ് ടീച്ചർ... അയ്യപ്പനെ കാണാൻ വരുന്നവരെ പോലീസ് സ്റ്റേഷനിൽ കൊണ്ടിരുത്തുന്ന ശ്രീ വിജയൻ വീണ്ടും പറയുന്നു ഞങ്ങൾ വിശ്വാസ്സികൾക്കൊപ്പമെന്ന്...!!?? ശബരിമലയിൽ ആചാരം പാലിച്ചു എത്തിയ സ്ത്രീ എന്ന കുറവാണ് ടീച്ചറിൽ പിണറായി കണ്ടത്...  ആചാര വിരുദ്ധമായി എത്തിയ യുവതി ആയിരുന്നെങ്കിൽ തോളിൽ എടുത്താണെങ്കിലും സന്നിധാനത്തെത്തിക്കാനുള്ള സംവിധാനം  ചെയ്യുമായിരുന്നു... കാരണം മുഖ്യന് ഒരൊറ്റ ലക്ഷ്യമേ ഉള്ളൂ... ""ശബരിമലആചാരങ്ങളെയും, അതുവഴി ശബരിമലയെയും തകർക്കുക""...... 

     ടീച്ചർ മലചവിട്ടിയ അവസ്സരത്തിൽ എന്ത് ക്രമസമാധാന പ്രശ്നമായിരുന്നു ശബരിമലയിൽ ഉണ്ടായിരുന്നത്?? ഒരു യുവതി പോലും മലകയറാൻ തയ്യാറായി നിൽക്കുന്നുണ്ടായിരുന്നില്ല.... യുവതികൾ മലകയറുന്ന അവസ്സരത്തിൽ മാത്രമാണ് ശബരിമലയിൽ പ്രതിഷേധം ഉയരുന്നത്... മറിച്ചുള്ള അവസ്സരങ്ങളിൽ ശബരിമല മുൻകാലങ്ങളിലെപ്പോലെതന്നെ ശാന്തമാണ്... ശ്രീ വിജയൻ അടിച്ചേൽപ്പിക്കുന്ന കരിനിയമങ്ങൾ മാത്രമാണ് ശബരിമലയിൽ നിലനിൽക്കുന്ന പ്രശ്നം.... മറ്റൊന്നുമില്ല... നെയ് അഭിഷേകം നടത്തുന്നതിന് നട അടക്കുന്ന നിമിഷം മുതൽ സന്നിധാനത്ത് 'Q' നിൽക്കുന്ന അനുഭവം ശബരിമലയിൽ പോയിട്ടുള്ള എല്ലാവര്ക്കും ഉണ്ടാകും... മുറികൾ വാടകയ്ക്ക് നൽകാതെയും,, കടകളും ,,, അന്നദാന കൗണ്ടറുകളും ബലമായി അടപ്പിച്ചും,, ശുചി മുറികളും, കുടിവെള്ള ടാപ്പുകളും അടച്ചിട്ടും ആരെയാണ് ഈ സർക്കാർ ബുദ്ധിമുട്ടിക്കാൻ ശ്രമിക്കുന്നത്?? ഇവിടുത്തെ വിശ്വാസ്സികളെയല്ലേ!!??.... എങ്കിലും മുഖ്യൻ വിളിച്ചു പറയുന്നു സർക്കാർ വിശ്വാസികൾക്കൊപ്പം എന്ന്..!!! [[[ശബരിമലയിലെ യുവതീ പ്രവേശനം... വിധിയിലേക്കെത്തിച്ച രാഷ്ട്രീയം...!??]]]

     ശബരിമലയിൽ എത്തുന്ന തീർഥാടകരെ കിലോമീറ്ററുകൾക്ക് മുൻപേ തടയുകയും,, വാഹനങ്ങൾക്ക് പാസ്സ് ഏർപ്പെടുത്തുകയും യുദ്ധസമാനമായ അന്തരീക്ഷം സൃഷ്ടിക്കുകയും തുടങ്ങിയ എല്ലാ ബുദ്ധിമുട്ടുകളും ഉണ്ടാക്കുക വഴി ശബരിമലയിലേക്കുള്ള തീർഥാടകരുടെ വരവ് കുറക്കുകയും അതുവഴി ശബരിമലയുടെ പ്രാധാന്യവും, ഹിന്ദുവിന്റെ ""അയ്യപ്പൻ"" എന്ന ചിന്തയിലെ ഒന്നായവികാരത്തെയും ഐക്യത്തെയും തകർക്കുകയുമാണ് ശ്രീ വിജയൻ ഉദ്ദേശിക്കുന്നത്.... ശബരിമലയിൽ ഒരു തീവ്രവാദി ആക്രമണത്തിന് സാധ്യത ഉണ്ടെന്നുള്ള മുന്നറിയിപ്പായിരുന്നെങ്കിൽ സുരക്ഷക്കായി ഇന്നു വിന്യസിച്ചിരിക്കുന്നതിന്റെ പത്തിലൊന്നു പോലീസിനെപ്പോലും വിജയൻ ഒരുക്കി നിർത്തില്ലായിരുന്നു... തീർച്ച.... 

     ശബരിമലയിൽ നിന്നും സംഘർഷം ഒഴിവാക്കാൻ അനുവദിക്കുന്ന പ്രശ്നമില്ല എന്ന രീതിയിലാണ് പിണറായി പ്രവർത്തിക്കുന്നത്... കോടതിവിധി ചർച്ചകളും, സമവായവും, സാവകാശവും കൂടാതെ നടപ്പിലാക്കാൻ ശ്രമിച്ചാൽ ഇവിടെ വലിയ പ്രതിഷേധങ്ങൾ ഉണ്ടാകുമെന്ന് മുഖ്യന് തിരിച്ചറിവില്ലാതിരുന്നതല്ല... അദ്ദേഹം അത് ആഗ്രഹിക്കുന്നു എന്ന് വേണം മനസ്സിലാക്കാൻ... ഭീതിപൂർവ്വം നമ്മൾ തിരിച്ചറിയേണ്ട ഒന്നുണ്ട്... ശബരിമല കലാപഭൂമി ആയാൽ മാത്രം പോരാ;; തർക്ക ഭൂമി കൂടി ആകണം എന്നദ്ദേഹം ശഠിക്കുന്നു എന്നതാണ്... അതിനാലാണ് ഇന്നുവരെ ശബരി മല വിഷയത്തിൽ സംഘർഷത്തിന് വഴിവെയ്ക്കുന്ന യാതൊരു പ്രത്യക്ഷ നിലപാടും സ്വീകരിച്ചിട്ടില്ലാത്ത മുസ്‌ലിം- ക്രിസ്ത്യൻ സമൂഹങ്ങളെക്കൂടി കലാപത്തിലേക്ക് ക്ഷണിക്കുക എന്ന ഉദ്ദേശത്തിൽ ഹൈകോടതിയിൽ സത്യവാങ്‌ന്മൂലം നൽകിയത്.. [[ശബരിമല സംഘർഷം;; ഒരു ഭരണാധികാരിയുടെ നിർമ്മിതി...!!??]]

     ഇന്നത്തെ പരിതസ്ഥിതിയിൽ രഹസ്യവും എന്നാൽ വ്യക്തവും ആയ അജണ്ടയാണ് പിണറായി ഇവിടെ നടപ്പിലാക്കുന്നത് എന്ന് വേണം മനസ്സിലാക്കാൻ... മറ്റു മന്ത്രിമാർ പോലും ഒരുപക്ഷെ കഥ അറിയാതെ ആട്ടം കാണുകയാകാം... പിണറായിയുടെ  അജ്ഞാനുവർത്തികൾ മാത്രമായ അവരൊക്കെ എന്തു ചെയ്യാൻ!!?? 

     ഒരിക്കലും സംശുദ്ധമായ രാഷ്ട്രീയ ജീവിതത്തിന്റെ ഉടമയല്ല നമ്മുടെ മുഖ്യൻ... അദ്ദേഹത്തിൻറെ പ്രവർത്തികൾ സൂക്ഷ്മമായി വിലയിരുത്തുന്നത് നമ്മുടെ സംസ്ഥാനത്തിന്റെ നിലനിൽപ്പിനു നല്ലതായിരിക്കും എന്ന് കാണണം... ശബരിമല സംഘർഷത്തിന് മുൻപും പിൻപും ഇടയിലും അദ്ദേഹം നടത്തിയ വിദേശ യാത്രകൾ പോലും ഈ അവസ്സരത്തിൽ സംശയിക്കപ്പെടേണ്ടതാണ്... 

     പ്രളയം പ്രത്യക്ഷമായോ പരോക്ഷമായോ ബാധിക്കാത്ത ആരും കേരളത്തിലില്ല എന്നതുപോലെ സമാധാനത്തിനു വിഘാതം സംഭവിക്കുന്ന എന്ത് ഇവിടെ ഉണ്ടായാലും അതിന്റെ ദോഷഫലം ഓരൊമനുഷ്യരെയും ബാധിക്കും... ആ വിചാരം ഇവിടുത്തെ ഭരണാധികാരിക്കില്ല... നമ്മൾ ജനങ്ങൾക്കെങ്കിലും ഉണ്ടാകണം.... 

[Rajesh Puliyanethu

 Advocate, Haripad]

ശബരിമല സംഘർഷം;; ഒരു ഭരണാധികാരിയുടെ നിർമ്മിതി...!!??

     
     ശബരിമലയിലെ യുവതീ പ്രവേശനമാണ് ഇന്ന് കേരളം ഭീതിയോടെ ചർച്ച ചെയ്തുകൊണ്ടിരിക്കുന്നത്... ഒരു സംഘർഷത്തിന്റെ മുനമ്പിലാണോ  നിൽക്കുന്നത് എന്ന് ഏവരും ഭയപ്പെടുന്നു... ഈ ഭയപ്പാടിന്റെ അവസ്ഥയും ഭീതിയും എങ്ങനെ ഉണ്ടായി ?? ഒരു വിധത്തിലും  ഒഴിവാക്കാൻ കഴിയുമായിരുന്ന ഒരു അവസ്ഥയായിരുന്നില്ലേ ഇത്?? ഈ കലാപത്തിന്റെ അന്തരീക്ഷം ഒഴിവാക്കാൻ കഴിയുന്നതായിരുന്നു എന്നു മാത്രമല്ല നമ്മൾ മനസ്സിലാക്കേണ്ടത് മറിച്ചു് വിവേകശൂന്യനും,, പിടിവാശിക്കാരനുമായ ഒരു ഭരണാധികാരി നിർമ്മിച്ച അരക്ഷിതാവസ്ഥയാണ് ഇന്ന് കേരളത്തിലുള്ളത് എന്നാണ്.... 

     കേരളം ഒരു പ്രളയത്തിൽ നിന്നും കരകയറിയതു പോലും ഉണ്ടായിരുന്നില്ല... മലയാളിക്കുണ്ടായ പ്രളയ കാഠിന്യം കണക്കാക്കിപ്പറഞ്ഞാൽ മൂക്കറ്റം വെള്ളം ഇറങ്ങി കഴുത്തറ്റത്തിൽ എത്തിയ ആശ്വാസം വരെയേ ആയിരുന്നുള്ളൂ... അങ്ങനെയുള്ള ഒരു ജനതയ്ക്ക് മേലാണ് ശ്രീ പിണറായി വിജയൻ ശബരിമല പോലെയൊരു സംഘർഷ വിഷയം അടിച്ചേൽപ്പിച്ചത്...  

     ശബരിമല വിഷയം എങ്ങനെയാണ് ഒരു ഭരണാധികാരിയുടെ പരിപൂർണ്ണമായ പരാജയം വരച്ചു കാട്ടുന്ന ഒന്നായി മാറിയത്?? എങ്ങനെയാണ് രാഷ്ട്രീയമായും,, ഭരണപരമായും ശ്രീ പിണറായി വിജയൻ തനിക്ക്  ചേരാത്ത ഒരു വേഷമാണ് മുഖ്യമന്ത്രിയുടേത് എന്ന് തെളിയിക്കുന്നത്.... 

     ശബരിമലയിൽ പ്രായഭേദമെന്യേ സ്ത്രീകൾക്ക് കയറാം എന്ന വിധി സുപ്രീം കോടതിയിൽ നിന്നും വരുന്നു... കേരളാ ഗവൺമെന്റിന് അത് നടപ്പിലാക്കാനുള്ള നിയമപരമായ ബാധ്യത ഉണ്ടെന്ന വാദം പരിപൂർണ്ണമായും അംഗീകരിക്കുന്നു... പക്ഷെ ആ വിധിയിലേക്ക് എത്തിയ സാഹചര്യങ്ങൾ എങ്ങനെയായാണ് മായ്ച്ചു കളയാൻ കഴിയുക?? 

     യു ഡി എഫ് കേരളം ഭരിക്കുന്ന അവസ്സരത്തിൽ ശബരിമല വിഷയത്തോട് അനുബന്ധിച്ചു ഒരു സത്യവാങ്മൂലം കോടതിയിൽ കൊടുത്തിരുന്നു.. അതിൽ വ്യക്തമാക്കിയിരുന്നത് ശബരിമലയിൽ യുവതികളെ പ്രവേശിപ്പിക്കുന്നതിന് സർക്കാർ അനുകൂലിക്കുന്നില്ല എന്നായിരുന്നു... ആ സത്യവാങ്മൂലം എൽ ഡി എഫ് സർക്കാർ തിരുത്തി നൽകിയതാണ് ശബരിമല വിഷയത്തിൽ ശ്രീ പിണറായി വിജയൻ രാഷ്ട്രീയം കലർത്തുന്നു എന്ന് പറയാനുള്ള ആദ്യ കാരണം... രാഷ്ട്രീയ കക്ഷികൾ മാറിമാറി ഭരണത്തിൽ വരുന്നതിനു അനുസരിച്ചു കോടതിയിൽ നിലപാടുകൾ മാറ്റണമെന്നത് ഏതു പുസ്തകത്തിൽ നിന്നുമാണ് കേരള മുഖ്യമന്ത്രി പഠിച്ചത്?? അവിടെ സി പി എം ന്റെ രാഷ്ട്രീയ നിലപാടായിരുന്നു സർക്കാർ നിലപാടായി കോടതിയിൽ  സ്വീകരിച്ചതെന്ന് കാണണം.. യു ഡി എഫ് സർക്കാർ സ്വീകരിച്ച നിലപാടിനെതിരെ ശ്രദ്ധേയമായ യാതൊരു എതിർപ്പുകളും ഉയർന്നു വരാതിരുന്ന വേളയിൽപ്പോലും കോടതിയിൽ നിലപാട് മാറിയതിനെ എങ്ങനെ മനസ്സിലാക്കണം!!??? എൽ ഡി എഫ് രാഷ്ട്രീയം വിശ്വാസികൾക്കുമേൽ അടിച്ചേൽപ്പിക്കുകയായിരുന്നു എന്നതിനപ്പുറം!? 

      സി പി എം ന്റെ രാഷ്ട്രീയ നിലപാട് യുവതികളെ പ്രവേശിപ്പിക്കുന്നതിനെ അനുകൂലിക്കുന്നതായിരുന്നെങ്കിൽ അത് പോലും നയപരമായി നടപ്പാക്കിയെടുക്കാൻ കഴിവില്ലാത്ത രാഷ്ട്രീയക്കാരനും, ഭരണാധികാരിയുമാണ് ശ്രീ പിണറായി വിജയൻ... അങ്ങനെ പറയാനും കാരണങ്ങൾ അധികമാണ്... കോടതി വിധി പുറത്തു വന്ന ദിവസ്സങ്ങളിൽ ബി ജെ പി യും, സംഘ പരിവാറും,, കോൺഗ്രസ്സും എടുത്ത നിലപാടുകൾ വിധിക്കും അതുപോലെ തന്നെ  സി പി എം ന്റെ രാഷ്ട്രീയ നിലപാടിനും അനുകൂലമായിരുന്നു... ആ രാഷ്ട്രീയ നിലപാട് എതിർ ശബ്ദങ്ങൾ രൂപം കൊണ്ടു വരാതെ തന്നെ നടപ്പിലാക്കി എടുക്കാനുള്ള നയപരമായ ബുദ്ധി എന്തുകൊണ്ട് ശ്രീ പിണറായിക്ക് ഇല്ലാതെ പോയി...?? തനിക്ക് അനുകൂലമായി നിന്ന എതിർ രാഷ്ട്രീയ കക്ഷികളുടെ നിലപാടുകളെപ്പോലും തങ്ങൾക്കെതിരായ പൊതുജന പ്രക്ഷോഭമാക്കി മാറ്റിയ ശ്രീ പിണറായി വിജയന്റെ രാഷ്ട്രീയ അപാരതയ്ക്കു പകരം വെയ്ക്കാൻ ഒന്നുമില്ലന്നെ പറയാനുള്ളൂ... അതും ശ്രീ വിജയൻറെ കഴിവായി പുകഴ്ത്തുന്നവരോട് ഒന്നേ ചോദിക്കാനുള്ളൂ... ചോര വീഴ്ത്തി കാര്യം നേടുന്നതിലേ അദ്ദേഹത്തിനു ത്രിൽ ഉള്ളോ;; എന്ന്... 

     ബി ജെ പി യും, സംഘ പരിവാറും,, കോൺഗ്രസ്സും എടുത്ത നിലപാടുകളെ കുറ്റപ്പെടുത്താൻ ആകില്ല... ഹിന്ദു വികാരങ്ങൾക്കൊപ്പം തങ്ങളുണ്ട് എന്ന് പ്രഖ്യാപിത നയം സ്വീകരിച്ചിട്ടുള്ള ബി ജെ പി ക്കും,, സംഘ പരിവാറിനും ഒരിക്കലും ഒരു സംഘടനാ നേതൃത്വത്തിൻ കീഴിൽ അല്ലാതെ പോലും ഉയർന്നു വരുന്ന ഹിന്ദു വിലാപ ശബ്ദത്തെ കേട്ടില്ലെന്നു നടിക്കാൻ കഴിയുമായിരുന്നില്ല... മുൻപെടുത്ത വിശാല കാഴ്ചപ്പാടുകളുടെ മാറാപ്പു പേറുകയായിരുന്നില്ല അവർക്കുചിതമായത്;; മറിച്ചു് വിശ്വാസ്സികൾക്കൊപ്പം ചേരുക തന്നെയായിരുന്നു... സ്വയം അപമാനഭാരത്തോടെ വിലപിക്കുന്ന ഹിന്ദു ശബ്ദങ്ങൾ ആയിരുന്നു തെരുവുകളിൽ നാമജപ ശബ്ദങ്ങളായി ഉയർന്നത്.. കോൺഗ്രസ്സിനും മറിച്ചൊരു നിലപാട് സാധ്യമല്ലാത്ത അവസ്ഥ സംജാതമായി... അപമാനഭാരത്തോടെ വിലപിക്കുന്ന ഹിന്ദുവിനെ സൃഷ്ടിച്ചതും, അവർക്കു പിന്തുണയായി മുഖ്യധാരാ രാഷ്ട്രീയ പ്രസ്ഥാനങ്ങളെ അണി  നിരത്തിയതിനുള്ള പങ്കും ശ്രീ പിണറായി വിജയനല്ലാതെ മറ്റാർക്കും അവകാശപ്പെടാൻ കഴിയില്ല... 

     ഒരു ജനാധിപത്യ രാജ്യത്തെ ഭരണാധികാരി ജനങ്ങളെ വില വെയ്ക്കണം എന്ന ഒരു സാമാന്യ മര്യാദ പോലും ശ്രീ പിണറായി വിജയൻ കാട്ടിയില്ല... പാർട്ടിയുടെ സംഘടനാ ശക്തിയും,, അധികാരവും ഉണ്ടെങ്കിൽ ആരോടും സൗമ്യനാകേണ്ട ആവശ്യമില്ല എന്ന നിലപാടുകാരനാണ് അദ്ദേഹം.. അതിൻ്റെ ഉദാഹരണങ്ങൾ ശബരിമല വിഷയത്തിൽത്തന്നെ പലതാണ്... വൈകാരികമായ ഒരു വിഷയത്തെ അദ്ദേഹം സമീപിച്ച രീതിതന്നെ ഒന്നു വിശകലനം ചെയ്തു നോക്കൂ... കോടതി വിധി വന്ന മാത്രയിൽത്തന്നെ "വിധി കർശനമായി നടപ്പിലാക്കും,, യാതൊരു സാവകാശവും നൽകില്ല" എന്ന പ്രസ്ഥാവന മുതൽ പിന്നിങ്ങോട്ട് ധാർഷ്ട്യം ഓരോ വാക്കിലും ശരീര ഭാഷയിലും നിഴലിച്ചു നിന്നിരുന്നു... കോടതി വിധി പ്രഖ്യാപിച്ചു ന്യായാധിപൻ അതിൽ ഒപ്പു വെച്ച് മഷി ഉണങ്ങിയ സമയമെടുത്തിരുന്നില്ല മുഖ്യന്റെ പ്രസ്ഥാവന വരുന്നതിന് എന്നതാണ് ശ്രദ്ധേയമായ കാര്യം...  വിധിയിൽ വിഷമമുള്ള ഒരു വിഭാഗം ഉണ്ടാകുമെന്ന് സ്വോഭാവികമായും അദ്ദേഹം മനസ്സിലാക്കേണ്ടത് ആണല്ലോ!? അവർക്ക് എന്തെങ്കിലും പരിഗണന ശ്രീ പിണറായി വിജയൻ കാട്ടിയിരുന്നെങ്കിൽ "വിധി പഠിക്കട്ടെ,, അതിനു ശേഷം തീരുമാനിക്കാം" എന്ന പതിവ് പല്ലവി എങ്കിലും പറയുമായിരുന്നില്ലേ!?? 

     സ്വതന്ത്ര ഭരണ ചുമതല ഉള്ള ദേവസ്വം ബോർഡിന്റെ ഭരണകാര്യങ്ങളിൽ കൈകടത്തിയും ശ്രീ പിണറായി വിജയൻ വിശ്വാസികളെ വെല്ലുവിളിക്കുന്നതിനല്ലേ ശ്രമിച്ചത്?? റിവ്യൂ പെറ്റിഷൻ കോടതിയിൽ സമർപ്പിക്കും എന്ന പദ്മകുമാറിന്റെ പ്രസ്താവന ശകാര രൂപത്തിൽ തിരുത്തേണ്ട കാര്യം എന്തായിരുന്നു അദ്ദേഹത്തിന്...?? ഉത്തരം ഒന്നേ ഉള്ളൂ,, വിശ്വാസികൾ എന്ന വിഭാഗത്തെ പരമ പുശ്ചത്തോടെ മാത്രമാണ് അദ്ദേഹം സമീപിച്ചിരുന്നത്... ആ പുശ്ചത്തിന്റെ പരിണിത ഫലമാണ് വിധിയുടെ തൊട്ടടുത്ത ദിവസ്സം ശിവസ്സേന പ്രഖ്യാപിച്ച ഹർത്താലിന് ഹിന്ദു സംഘടനകളുടെ പോലും പിന്തുണയില്ലാതെ പിൻവലിച്ചിടത്തുനിന്ന് സമസ്ത ഹിന്ദു സംഘടനകളുടെയും, കൊണ്ഗ്രെസ്സ് ഉൾപ്പെടെയുള്ള രാഷ്ട്രീയ കക്ഷികളുയെയും പിന്തുണയോടെ കേരളം കണ്ട ഏറ്റവും വലിയ വിശ്വാസ്സി പ്രക്ഷോഭമായി മാറിയത്.... 

     കേരള സർക്കാർ കൊടുത്ത സത്യവാങ്മൂലത്തിന് അനുകൂലമായി ലഭിച്ച വിധിക്ക് എതിരെ തിരുത്തൽ ഹർജി നിലനിൽക്കുകയില്ലന്ന  സാങ്കേതികത്വം മുഖ്യൻ നിരത്തുന്നതിനെ നമുക്ക് അംഗീകരിക്കാം... എന്നാൽ നൂറ്റാണ്ടുകളായി നിലനിൽക്കുന്ന ആചാരരീതി മണ്ഡലകാലത്തിനു തൊട്ടു മുൻപ് നടപ്പിലാക്കുന്നതിലെ ബുദ്ധിമുട്ടു വിവരിച്ചു കൂടുതൽ സമയം ആവശ്യപ്പെട്ടുകൊണ്ട് ഒരു ഹർജി കോടതിയിൽ സമർപ്പിച്ചിരുന്നെങ്കിൽ തീർച്ചയായും അനുവദിക്കപ്പെടുമായിരുന്നു... വിധിയുടെ പശ്ചാത്തലത്തിൽ നിന്നുകൊണ്ട് സമൂഹത്തിൽ വിശദമായി ചർച്ച ചെയ്യുന്നതിനുള്ള ഒരു വലിയ അവസ്സരമായിരുന്നില്ലേ അതുവഴി ലഭിക്കുമായിരുന്നത്?? ആ ചർച്ചകളുടെ സമയം ഒരിക്കലും പ്രക്ഷോഭങ്ങൾ ഉയരുമായിരുന്നില്ല... സമൂഹം കലുഷിതമാകുമായിരുന്നില്ല... അവിടെ സമൂഹത്തിന് ഒന്നും നഷ്ടമാകുമായിരുന്നില്ല;; എന്നാൽ സി പി എം നു ജനങ്ങളെ ജാതി പറഞ്ഞു വിഘടിപ്പിക്കുന്നതിനുള്ള അവസ്സരം മാത്രം ഇല്ലാതാകുമായിരുന്നു...

     നവകേരളം നിർമ്മിക്കാൻ കൈയ്യിൽ കരണ്ടിയുമായി നിൽക്കുന്ന ഒരു മുഖ്യൻ കേരളത്തിനില്ല... അദ്ദേഹം രാഷ്ട്രീയ വിശദീകരണ യോഗങ്ങൾ സംഘടിപ്പിക്കുന്ന തെരക്കിലാണ്‌... ശബരിമല വിഷയത്തിൽ രാഷ്ട്രീയ വിശദീകരണ യോഗങ്ങൾ സംഘടിപ്പിക്കുന്നതുവഴി സി പി എം ഒരു കാര്യം സമ്മതിക്കുന്നു... ""ശബരിമലയിൽ അവരുടെ വിഷയം രാഷ്ട്രീയമാണ്"" വിശ്വാസ്സികളെ സംരക്ഷിക്കുമെന്നത് വെറും പോയ് വാക്കു മാത്രം... 

     സി പി എം സംഘടിപ്പിക്കുന്ന രാഷ്ട്രീയ വിശദീകരണ യോഗങ്ങളിൽ സൈദ്ധാന്തികമായും,, പ്രത്യയ ശാസ്ത്രപരമായും നിലനിൽക്കുന്ന തമാശകൾ അനവധിയാണ്... ഒരു ഉദാഹരണം പറയാം... അയ്യപ്പന്റെ നൈഷ്ഠിക ബ്രഹ്മചര്യമാണ് പലയിടത്തെയും ചർച്ചാ വിഷയം... ശബരി  മലയിലെ മൂല ശാസ്താ വിഗ്രഹത്തിൽ വിലയം പ്രാപിക്കുകയായിരുന്നു അയ്യപ്പനെന്നും അതിനാൽ പത്നീ സമേതനായ ശാസ്താവാണ് അടിസ്ഥാനം എന്നവർ ആധികാരികമായി പറഞ്ഞു വെയ്ക്കുന്നു... സന്തോഷം തന്നെ... ശാസ്‌താവിലും, അയ്യപ്പനിലും ഉള്ള സംശയങ്ങൾ അവർക്കു മാറിയല്ലോ.. ഇനി അവശേഷിക്കുന്ന സംശയം അയ്യപ്പൻറെ ബ്രഹ്മചര്യത്തെപ്പറ്റി മാത്രമല്ലേ ഉള്ളൂ..!?? കാലം അതും മാറ്റിത്തരും എന്ന് പ്രതീക്ഷിക്കാം... ഈ പാർട്ടിയും വളരുന്നുണ്ട്....

     രാഷ്ട്രീയ വിശദീകരണ യോഗങ്ങളിൽ മുഖ്യ മന്ത്രി നേരിട്ട് നടത്തുന്ന ചില വിശദീകരണങ്ങൾ അദ്ദേഹത്തെ സ്വയം അപഹാസ്യനാക്കുന്നു എന്ന് പോലും തോന്നിപ്പോകുന്നു... കേരള ഹൈകോടതിയിൽ നിന്നും 1991 ൽ വന്ന വിധിക്കു മുൻപ് യുവതീ പ്രവേശനം സുഗമമായി നടന്നിരുന്ന രീതിയിലാണ് അദ്ദേഹം സംസാരിക്കുന്നത്... അതിന് തന്ത്രികുടുംബത്തിലെ ഏതോ സ്ത്രീ കയറിയ കഥയും ഉദാഹരിച്ചു കേട്ടു... തന്ത്രിയുടെയോ,, കൊട്ടാരത്തിന്റെയോ ആരുടേയും സ്വന്തക്കാരും, ബന്ധുക്കളുമാകട്ടെ;; ഏതൊരു യുവതിയുടെ പ്രവേശനത്തെയും ഇവിടുത്തെ വിശ്വാസി സമൂഹം അംഗീകരിക്കുന്നില്ല എന്ന് അദ്ദേഹം മനസ്സിലാക്കണം.. തെറ്റ് ഏതു കാലത്ത് ആരു ചെയ്താലും അത് തിരുത്തപ്പെടുകയാണ് വേണ്ടത്... സംഭവിച്ച തെറ്റ് ശരിയെന്ന പോലെ അനുവർത്തിക്കുകയല്ല ഉചിതം....

     വിധി നടപ്പിലാക്കുന്നതിന് സമയം എങ്കിലും ആവശ്യപ്പെട്ട് കേരളത്തെ സംഘർഷ ഭൂമിയാക്കി മാറ്റുന്നതിനെ ഒഴിവാക്കുന്നതിനുള്ള ഒരു ശ്രമവും കേരള മുഖ്യൻ ചെയ്തില്ല എന്ന് നമ്മൾ ദുഃഖത്തോടെ തന്നെ മനസ്സിലാക്കണം.. മാത്രമല്ല അദ്ദേഹത്തിനെക്കൊണ്ട് കഴിയുന്ന രീതിയിൽ അഗ്നിയിൽ എണ്ണ ഒഴിക്കുകയും ചെയ്തു... പ്രളയത്തിനു ശേഷമുള്ള പുനർ നിർമ്മാണമാണ് ഇപ്പോൾ ആവശ്യം എന്ന് അദ്ദേഹം ഓർത്തില്ല...!!! ഇപ്പോഴും ക്യാമ്പുകളിൽ കഴിയുന്നവരെക്കുറിച്ചു അദ്ദേഹം ഓർത്തില്ല...!!! പോലീസ് നടപടികൾക്കാവശ്യമായി വരുന്ന ഭീമമായ ചെലവുകളെക്കുറിച്ചു അദ്ദേഹം ഓർത്തില്ല...!!! ഒരു സംഘർഷം ഉണ്ടായാൽ അതിൽ നിന്നും മുതലെടുക്കാൻ വിധ്വംസ്സക ശക്തികൾ ഉണ്ടാകുമെന്ന് അദ്ദേഹം ഓർത്തില്ല...!!! അങ്ങനെ ജനതയെക്കുറിച്ചു ഒരുപാട് കരുതലുകൾ ആവശ്യമുള്ളവനാണ് ഒരു ഭരണാധികാരി... എന്നാൽ മനസ്സിൽ സംഘർഷത്തിന്റെ സുഖം മാത്രം പ്രതീക്ഷിച്ചു ഭരിക്കുന്ന ഒരു ഭരണാധികാരിയാണ് ഇന്ന് കേരളത്തിനുള്ളത്... 

     ന്യൂനപക്ഷ പ്രീണനം ഇഷ്ട്ട വിഷയമായ ശ്രീ പിണറായി വിജയന് ശബരിമല വിഷയത്തിൽ എടുത്തത തീരുമാനങ്ങളിൽ അപ്രകാരം ഒരു നേട്ടവും ഉണ്ടാക്കാൻ കഴിഞ്ഞില്ല.... എന്നാൽ ന്യൂന പക്ഷങ്ങൾ ചെറിയ നേട്ടം ഉണ്ടാക്കി എന്ന് മനസ്സിലാക്കാം... വിശ്വാസ്സത്തിന്റെ പേരിൽ സ്ഥിരം സംഘടനങ്ങളിൽ ഏർപ്പെടുന്ന ഇക്കൂട്ടർ ശബരിമല വിഷയത്തിൽ വിശ്വാസ്സികൾക്കൊപ്പം നിന്നുകൊണ്ട് വരും കാലങ്ങളിൽ തങ്ങൾക്കുള്ള ഹിന്ദു വിശ്വാസ്സികളുടെ പിന്തുണ ഉറപ്പിച്ചു... എന്തായാലും ഹിന്ദു വിശ്വാസ്സികൾക്കൊപ്പം മറ്റു മതസ്ഥരും ഒത്തുചേർന്നതോടെ മതങ്ങൾക്കിടയിൽ വിടവ് സൃഷ്ട്ടിക്കാൻ സി പി എം നു കഴിയാതെ പോയി... അതിനാൽ അവർ അത് ജാതികൾക്കിടയിലേക്ക് തൽക്കാലം ഒതുക്കി നിർത്തി... 

     ഒരു ഭരണാധികാരിയായി ശ്രീ പിണറായി വിജയൻ നിൽക്കുന്നിടത്തോളം കാലം അദ്ദേഹം ജനങ്ങളുടെ വികാരങ്ങളെ ഉൾക്കൊള്ളുന്ന നയവും ഹൃദയ വിശാലതയും കാട്ടണം.... ജനങ്ങളുടെ വികാരങ്ങൾക്കൊപ്പം വഴക്കമുള്ള സ്വഭാവം പ്രകടിപ്പിച്ചാൽ തന്റെ ചങ്കുറപ്പിന് എന്തെങ്കിലും കുറവു പറ്റിയെന്ന് അണികൾ കരുതുമെന്നാണ് അദ്ദേഹത്തിൻറെ ഭയം... സ്വയം പ്രതിബിംബത്തിൽ കിങ് ജോംഗ് ഉൻ നെ കാണുന്ന പ്രകൃതം കൂടിയായപ്പോൾ കേരള ജനതയ്ക്ക് ലോട്ടറിയടിച്ചു... ഈ സമീപനം തുടർന്നാൽ ഇന്ന് സ്തുതി പാടുന്ന അണികൾ സഹിതം ""കേരളത്തിന് കൊള്ളിവെച്ച നേതാവ്"" എന്ന് അദ്ദേഹത്തെ കൂവി വിളിക്കുന്നത് കാണാം.. അങ്ങനെ ഉണ്ടാകാതിരിക്കട്ടെ....

[Rajesh Puliyanethu

 Advocate, Haripad]

ശബരിമലയിലെ യുവതീ പ്രവേശനം... വിധിയിലേക്കെത്തിച്ച രാഷ്ട്രീയം...!??

     ഇന്ന് കേരളമൊട്ടാകെ ഏറ്റവും കൂടുതൽ ഉയർന്നു കേൾക്കുന്ന ശബ്ദം അയ്യപ്പ ശരണ മന്ത്രങ്ങളുടേതാണ്... ഇക്കഴിഞ്ഞ കാലങ്ങളിലൊന്നും ഇത്രയധികം ശരണ മന്ത്രങ്ങൾ മലയാള നാടിന്റെ അന്തരീക്ഷത്തെ മുഖരിതമാക്കിയിട്ടില്ല... കാരണം ഇത്രയധികം സ്ത്രീകൾക്കൂടി ശരണം വിളിച്ചു തെരുവിലിറങ്ങിയ കാലം ഇതിനു മുൻപ് ഉണ്ടായിട്ടില്ല... ഒരു മണ്ഡല കാലം അല്ലാതിരുന്നിട്ടുകൂടി എന്താണ് ഇങ്ങനെ ഒരു കൂട്ട ശരണം വിളിക്കു കാരണം!!??  എന്താണ് ഈ ശരണം വിളികളുടെ പ്രത്യേകത!??

     ഈ ശരണം വിളികളുടെ പ്രത്യേകതയാണ് നമ്മൾ ആദ്യം കാണേണ്ടത്... ഈ ശരണം വിളി സാധാരണ മാലയിട്ട് വൃതം അനുഷ്ഠിച്ചു മലചവിട്ടാൻ പോകുന്ന അയ്യപ്പന്മാരുടെ ഭക്തി മാത്രം നിറഞ്ഞ ശരണം വിളിയല്ല... ഈ ശരണം വിളികളിൽ തങ്ങളുടെ വിശ്വാസ്സങ്ങളെയും, അനുഷ്ഠാനങ്ങളേയും ചവിട്ടി അരക്കുന്നതിലുള്ള അമർഷമുണ്ട്... അതിനു കാരണക്കാരായവരോടുള്ള വിരോധവും, പകയുമുണ്ട്... അത് ഞങ്ങൾ അനുവദിച്ചു തരില്ല എന്ന നിശ്ചയദാർഢ്യമുണ്ട്... രാഷ്ട്രീയ കോമരങ്ങളുടെ ദുഷ്ടലാക്കിനു തങ്ങളുടെ ആരാധനാ മൂർത്തികളെ വിട്ടുതരില്ല എന്ന മുന്നറിയിപ്പുണ്ട്... സഹനത്തിന് തങ്ങളും പരിധി നിർണ്ണയിച്ചിട്ടുണ്ട് എന്ന പ്രഖ്യാപനമുണ്ട്... അങ്ങനെ പലവിധമായ സന്ദേശങ്ങൾ ബഹിർഗമിക്കുന്ന ശരണം വിളികളാണ് നാം കേൾക്കുന്നത്...

     സുപ്രീം കോടതി ശബരിമലയിൽ സ്ത്രീ പ്രവേശനത്തിനുള്ള വിലക്ക് എടുത്തു കളഞ്ഞിരിക്കുന്നു എന്നതാണ് പ്രതിഷേധം ഇരമ്പി ഉയരുന്നതിനുള്ള കാരണം... കോടതികളിൽ വർഷങ്ങളായി നിലനിൽക്കുന്ന നിയമ തർക്കങ്ങളുടെ അവസ്സാനമാണ് എങ്ങനെ ഒരു വിധി ഉണ്ടായിരിക്കുന്നത്... അവിടെ വിശ്വാസ്സ സമൂഹത്തിന് എതിരെ സംസ്ഥാന സർക്കാർ എടുത്ത നിലപാടാണ് ഈ വിധിക്കെതിരെയുള്ള വികാരം സർക്കാരിനെതിരെ തിരിയാൻ കാരണം... സ്ത്രീകളെ ശബരിമലയിൽ പ്രവേശിപ്പിക്കണം എന്ന് എൽ ഡി എഫ് സർക്കാർ എടുത്ത നിലപാട് കേരളം മുൻപ് എടുത്തിരുന്ന നിലപാടിന് വിരുദ്ധമാണ്... ഒരു സംസ്ഥാനത്ത് നിലനിൽക്കുന്ന സാഹചര്യത്തിന്റെ യഥാർഥ മുഖം പ്രസ്തുത വിഷയത്തിൽ സുപ്രീം കോടതി മുൻപാകെ അവതരിപ്പിക്കാനുള്ള ബാദ്ധ്യത സംസ്ഥാന സർക്കാരുകൾക്കുണ്ട്... എന്തിനും ഏതിനും 'കേരളത്തിലെ പ്രത്യേക സാഹചര്യം' എന്ന് പുലമ്പുന്ന ഇവർ എന്തേ വിശ്വാസ്സ സമൂഹത്തിന്റെ മനസ്സും വികാരവും കാണാതെ പോയി??  കാരണം സുവ്യക്തമാണ്.. ! കമ്യുണിസ്റ്റ് ആശയങ്ങൾ വിശ്വാസ്സ സമൂഹത്തിനു മേൽ അടിച്ചേൽപ്പിച്ചു ഹിന്ദുക്കളെ വിരുദ്ധ ചേരികളിൽ അണിനിരത്തുക... അതിനൊപ്പം തങ്ങൾ നവോഥാന നായകർ എന്ന് സ്വയം മേനി പറയുക... ഒരു കാര്യം ഉറപ്പിച്ചു പറയാം.. ഉമ്മൻ‌ചാണ്ടി സർക്കാർ സുപ്രീം കോടതിയിൽ കൊടുത്ത സത്യവാങ് മൂലത്തെ പിണറായി സർക്കാരും പിന്തുടർന്നിരുന്നെങ്കിൽ കേരളത്തിലെ അമ്മമാർക്ക് സഹിതം തെരുവിലിറങ്ങി പ്രതിഷേധ ശരണം വിളിക്കേണ്ടി വരുമായിരുന്നില്ല.... 

     എന്താണ് ശബരിമലയിൽ സ്ത്രീകളെ പ്രവേശിപ്പിക്കുന്നതിൽ വിലക്ക് കല്പിക്കുന്നതിന് കാരണം?? അത് മനസ്സിലാക്കുന്നതിനു മുൻപ് ക്ഷേത്രവും, വിശ്വാസ്സവും എന്താണെന്ന് മനസ്സിലാക്കണം... ഒരു ശ്രീകോവിലിനുള്ളിലെ മൂർത്തിയും ആ ശ്രീകോവിൽ ഉൾക്കൊള്ളുന്ന മതിൽക്കെട്ടും ആ മതിൽക്കെട്ടിനുള്ളിൽ മൂർത്തിക്കുവേണ്ടി എന്ന വിശ്വാസ്സത്തിൽ വിശ്വാസ്സികൾ നടത്തുന്ന ആരാധനാക്രമങ്ങളും, നിയമങ്ങളും ഉൾക്കൊള്ളുന്നതാണ് ക്ഷേത്രം.. ക്ഷേത്രത്തിനുള്ളിലെ മൂർത്തിയെ ആരാധിക്കാനും വിശ്വസിക്കാനുമുള്ള സ്വാതന്ത്ര്യം വിശ്വാസിക്കുണ്ട്.... ആ വിശ്വാസ്സങ്ങളെ വെച്ച് പുലർത്താനുള്ള സ്വാതന്ത്ര്യം വിശ്വാസിക്ക് ഭാരതത്തിന്റെ ഭരണഘടന അനുവദിച്ചു നൽകുന്നുമുണ്ട്‌... വിശ്വസിച്ചേ മതിയാകൂ എന്ന നിബന്ധന ഒരു ക്ഷേത്രവും മുന്നോട്ടു വെയ്ക്കുന്നില്ല... അവിശ്വാസ്സികൾ അകലം പാലിക്കണം.. അതാണ് മാന്യത.. ഒരിക്കലും അവിശ്വാസിക്ക് വിശ്വാസിയുടെ മനസ്സും വികാരവും തിരിച്ചറിയാൻ കഴിയില്ല... മാത്രമല്ല, ഈശ്വര വിശ്വാസ്സങ്ങൾ എപ്പോളും അന്ധമായതാണ്... കാരണം ആരും നേരിട്ട് ദൈവത്തെ കണ്ടു ബോധ്യപ്പെട്ടു വിശ്വസ്സിക്കുന്നില്ല... ആ വിശ്വാസ്സം വിശ്വാസ്സിയുടെ അനുഭവവും സംതൃപ്തിയുമാണ്... ഈ സത്യം തിരിച്ചറിഞ്ഞു തന്നെയാണ് ഭാരതത്തിന്റെ ഭരണഘടന ആരാധനയ്ക്കുള്ള സ്വാതന്ത്ര്യം അനുവദിച്ചു തന്നിരിക്കുന്നത്... 

      നിയമവിരുദ്ധ പ്രവർത്തനം ഒരു ആരാധനാലയത്തിനുള്ളിൽ നടക്കാത്തിടത്തോളം കാലം ആരാധനയും, വിശ്വാസ്സവും, അനുഷ്ഠാനവും  വിശ്വാസ്സിയുടെ മാത്രം തിരഞ്ഞെടുപ്പാണ്.. അവിടെ, അധികാരത്തിന്റെ വാളുമായി കടന്നു ചെല്ലുന്നതാണ് തെറ്റ്... ഒരു നിയമ ലംഘനം കണ്ടെത്തുന്നതിനായി നിലവിലെ നിർദോഷമായ ക്രമങ്ങളെ നിയമ വിരുദ്ധമായി പ്രഖ്യാപിക്കുന്നത് അതിലേറെ തെറ്റ്... ശബരിമലയിൽ അതാണ് സംഭവിച്ചിരിക്കുന്നത്... നിലവിൽ തുടർന്ന് വരുന്ന സമസ്ത വിശ്വാസ്സ സമൂഹത്തിനും സ്വീകാര്യമായ,, സാമൂഹ്യ നീതിയെ ഒരു തരത്തിലും ചോദ്യം ചെയ്യാത്ത ഒരു ക്ഷേത്രനിയമത്തിലേക്ക് കേരള സർക്കാരിന്റെ കള്ളച്ചുവട്‌ വിശ്വസ്സിച്ചു സുപ്രീം കോടതി കടന്നു കയറിയിരിക്കുകയാണ് ചെയ്തിരിക്കുന്നത്... വിശ്വാസ്സ സമൂഹത്തിന് നേരേയുള്ള കേരള സർക്കാരിന്റെ വെല്ലുവിളിയായിരുന്നു സുപ്രീം കോടതിയിൽ നൽകിയ സത്യവാങ് മൂലം എന്ന് ആവർത്തിച്ചു പറയേണ്ടി വരുന്നു...

     എന്ത് കാരണത്താലായിരുന്നു ശബരിമലയിൽ മാത്രം യുവതികളായ സ്ത്രീകളെ പ്രവേശിപ്പിക്കുന്നതിൽ നിന്നും വിലക്കിയിരുന്നത്?? അതിനുത്തരം ശബരിമലയിലെ മൂർത്തിയുമായി ബന്ധപ്പെട്ടതാണ്... അയ്യപ്പനാണ് ശബരിമലയിലെ ആരാധനാ മൂർത്തി... അവിടെ അയ്യപ്പനെ എപ്രകാരം വിവരിക്കപ്പെട്ടിരിക്കുന്നോ അപ്രകാരമാണ് വിശ്വാസ്സികൾ വിശ്വസിക്കുന്നത്... അത് വിശ്വാസ്സിയിൽ മാത്രം നിക്ഷിപ്തമായ സ്വാതന്ത്ര്യമാണ്... അയ്യപ്പൻ നൈഷ്ഠിക ബ്രഹ്മചാരിയാണ്.. അതാണ് സങ്കല്പം.. അയ്യപ്പനെ വേൾക്കാൻ ആഗ്രഹിച്ച ദേവിയുടെ ഇൻഗിതത്തെ അവഗണിച്ചു മാളികപ്പുറത്തമ്മയായി തൻ്റെ ക്ഷേത്രത്തിനു പുറത്തിരുത്തി എന്നാണ് ഐതീഹ്യം.. അങ്ങനെ നൈഷ്ഠിക ബ്രഹ്മചാരിയായി  നിലനിൽക്കാൻ ഇച്ഛിക്കുന്ന ദേവൻ യുവതികളായ സ്ത്രീകളുടെ സാനിദ്ധ്യം ഇഷ്ട്ടപ്പെടുന്നില്ല എന്നും ഭക്തർ വിശ്വസ്സിക്കുന്നു... അത് ഭക്തന്റെ വിശ്വാസ്സമാണ്‌.... ആ വിശ്വാസ്സത്തെ പരിപാലിക്കാനുള്ള സ്വാതന്ത്ര്യം വിശ്വാസ്സിക്കുണ്ട്... അയ്യപ്പൻ ഹരിഹര പുത്രനാണെന്നും, പന്തള രാജകുമാരനാണെന്നും, മഹിഷീ മർദ്ദനനാണെന്നും,,  നൈഷ്ഠിക ബ്രഹ്മചാരിയാണെന്നും എല്ലാം വിശ്വാസ്സമാണ്‌... ഈ വിശ്വാസ്സങ്ങളെ മാറ്റി നിർത്തിയാൽ പിന്നെ അയ്യപ്പനില്ല.. അയ്യപ്പനെന്ന മൂർത്തിയുടെതന്നെ അസ്തിത്വം നഷ്ടപ്പെടും... അങ്ങനെ അയ്യപ്പൻ ഇല്ലാതാകുന്നത് ഇവിടുത്തെ വിശ്വാസ്സി സമൂഹം ഇഷ്ടപ്പെടുന്നില്ല... അതുകൊണ്ടാണ് അവർ തെരു വീഥികളെ പ്രകമ്പനം കൊള്ളിച്ചു കൊണ്ട് തങ്ങൾക്കു കഴിയുന്നത്ര ഉച്ചത്തിൽ ശരണം വിളിക്കുന്നത്... അപ്രകാരം തങ്ങളുടെ വിശ്വാസ്സ പ്രമാണങ്ങളിലെ അയ്യപ്പനെ സംരക്ഷിക്കാനാണ് പ്രക്ഷോഭങ്ങൾ സംഘടിപ്പിക്കുന്നത്... 

     പുരോഗമന ചിന്തയുടെ സാങ്കൽപ്പിക കിരീടമണിഞ്ഞു നടക്കുന്ന ചില കരി ദീപങ്ങൾ ചോദിക്കുന്ന ചോദ്യമുണ്ട്... "ദൈവത്തെ രക്ഷിക്കാനാണോ ആൾക്കാർ തെരുവിലിറങ്ങുന്നത്?? സ്വയം രക്ഷിക്കാൻ കഴിവില്ലാത്തവനാണോ ദൈവം?? അവർക്കുള്ള ഉത്തരം ഒരു പ്രാവശ്യം പറഞ്ഞു കൊടുക്കണം... ഒന്നുകൂടി ആവർത്തിക്കാൻ നിൽക്കരുത്... കാരണം ചോദ്യം ഉയർത്തിതന്നെ തന്റെ ഉള്ളിലെ ശൂന്യത വെളിവാക്കിയവരാണവർ... അവരുടെ ഓട്ടച്ചാക്കിലേക്ക് അരി നിറച്ചു നമ്മുടെ വിലപ്പെട്ട സമയം പാഴാക്കരുത്...

     ആർത്തവകാലമാണ് ശബരിമലയിൽ യുവതികളെ പ്രവേശിപ്പിക്കുന്നതിന് വിലക്കായി നിൽക്കുന്നത് എന്ന വാദഗതിയോട് യോജിക്കാൻ കഴിയുന്നില്ല... ആ കാരണം മന:പ്പൂർവ്വം വിധിയെ അനുകൂലിക്കുന്ന വിഭാഗം  ഉയർത്തിയതാകാനാണ് സാദ്ധ്യത... കാരണം വിശ്വാസ്സികളും, ശബരിമലയിൽ യുവതീ പ്രവേശനത്തെ എതിർക്കുന്നവരുമായ സ്ത്രീകളെ സമര മുഖത്തുനിന്നും അകറ്റി നിർത്തുന്നതിന് ആ കാരണം ഉയർത്തുന്നത് വഴി വെച്ചേക്കാം എന്നവർ കണക്കു കൂട്ടുന്നു... ശ്രീ പിണറായി വിജയന്റെ സേവകൻ മാത്രമായ പദ്മകുമാർ നിയന്ത്രിക്കുന്ന ദേവസ്വം ബോർഡ് ആർത്തവകാലം യുവതീ പ്രവേശനത്തെ എതിർക്കുന്നത്തിനുള്ള കാരണമായി സുപ്രീം കോടതിയിൽ ഉയർത്തിയതിലും ദുരൂഹത കാണാം..  ആർത്തവകാലം കാരണം നാൽപ്പത്തി ഒന്ന് ദിവസ്സം വൃതം എടുക്കാൻ കഴിയില്ല എന്നും അതിനാൽ യുവതീ പ്രവേശനത്തെ അനുകൂലിക്കാൻ കഴിയില്ല എന്ന നിലപാട് കോടതിയിൽ നിൽക്കില്ല എന്നത് ആ കാരണം ഉയർത്തി കേസ്സുനടത്തിയവർക്ക് തീർച്ചയായും ബോദ്ധ്യമുണ്ടായിരുന്നതാകണം.. ദേവസ്വം ബോർഡിന്റെ സുപ്രീം കോടതിയിലെ പ്രധാന വാദഗതി ഇതായിരുന്നിരിക്കെ നാസ്ഥിക സർക്കാരുമായി ദേവസ്വം ബോർഡ് സുപ്രീം കോടതിയിൽ ഒത്തുകളിക്കുകയായിരുന്നോ എന്ന് നമ്മൾ സംശയിക്കണം....

     ഒരിക്കലും സ്ത്രീകൾക്ക് ആർത്തവകാലം ഉള്ളതല്ല യുവതികളെ പ്രവേശിപ്പിക്കുന്നതിൽ നിന്നും വിലക്കാൻ കാരണം... നൈഷ്ഠിക ബ്രഹ്മചാരിയായി നിലനിൽക്കാൻ ഇച്ഛിക്കുന്ന ദേവൻ യുവതികളായ സ്ത്രീകളുടെ സാനിദ്ധ്യം ഇഷ്ട്ടപ്പെടുന്നില്ല എന്ന് ഭക്തർ അതിപുരാതന കാലം മുതൽ വിശ്വസ്സിച്ചു വന്നിരുന്നതാണ് കാരണം... നാൽപ്പത്തി ഒന്ന് ദിവസ്സം വൃതം എടുക്കുന്നത് കാരണമായി പറഞ്ഞാൽ പുരുഷന്മാർ പോലും മുഖാമുഖം നോക്കും.. കാരണം ഇന്ന് ശബരിമല ദർശനം നടത്തുന്നതിൽ പകുതിയിൽ അധികം ആൾക്കാരും നാൽപ്പത്തി ഒന്ന് ദിവസ്സം വൃതം എടുക്കുന്നില്ല എന്നതാണ് സത്യം... പുരാതന കാലത്തും എത്ര സ്വാമിമാർ നാൽപ്പത്തി ഒന്ന് ദിവസ്സം വൃതം എടുത്തിരുന്നു എന്നും വ്യക്തമായ കണക്കുകളില്ല... ഇന്ന് ദർശനം നടത്തുന്നതിൽ എത്ര സ്വാമിമാർ നാൽപ്പത്തി ഒന്ന് ദിവസ്സം വൃതം എടുത്തു ദർശനം നടത്തുന്നു എന്ന് നിരീക്ഷിക്കാൻ മാർഗ്ഗങ്ങളുമില്ല.. അങ്ങനെ വ്യക്തത ഇല്ലാത്ത കാരണം എങ്ങനെയാണ് കോടതിയിൽ നിലനിൽക്കുക?? അങ്ങനെ ഒരു കാരണത്താൽ ഏതു കോടതിയായാണ് സ്ത്രീകളെ വിലക്കി നിർത്തുക!??  "നാൽപ്പത്തി ഒന്ന് ദിവസ്സം വൃതം എടുക്കുക" എന്നത് യുവതീ പ്രവേശനത്തിനെ എതിർക്കുന്ന കാരണമായി ഉയർത്തിയാൽ അതെത്ര ദുർബലമായിരിക്കും എന്ന് നോക്കൂ...!! പക്ഷെ ഇതായിരുന്നു കോടതിയിൽ ദേവസ്വം ബോർഡ് ഉയർത്തിയ പ്രധാന വാദം... അവിടെയാണ് സുന്ദരമായ മുഖത്തോടെ ദേവസ്വം ബോർഡ് സർക്കാരുമായി ചേർന്ന് വിശ്വാസ്സികളെ വഞ്ചിച്ചു എന്ന് നമ്മൾ മനസ്സിലാക്കേണ്ടത്...

     സ്ത്രീ സ്വാതന്ത്ര്യം,, സ്ത്രീ സമത്വം തുടങ്ങിയ വിഷയങ്ങൾ ശബരിമലയോട് ചേർത്തുവെച്ചു പറയുന്നവരുണ്ട്... ശബരിമലയിൽ പ്രവേശിക്കുന്നതോടെയാണോ സ്ത്രീയുടെ  സമത്വ ഭാവനകൾ പൂർണ്ണമാകുന്നത്?? ശബരിമലയിൽ സ്ത്രീ പ്രവേശനം നിഷേധിച്ചിരിക്കുന്നു എന്ന പ്രയോഗം തന്നെ തെറ്റാണ്... പുരുഷ മേധാവിത്വമാണ് ശബരിമലയിൽ സ്ത്രീ പ്രവേശനം നിഷേധിക്കുന്നതിന്
കാരണം എന്നും പറഞ്ഞു കേൾക്കുന്നു...  ശബരി മലയിൽ ഒറ്റയ്ക്ക് പോകുന്ന പുരുഷൻ മറ്റു ക്ഷേത്രങ്ങളിൽ തന്റെ അമ്മയും, സഹോദരിയും, ഭാര്യയും കൂട്ടിത്തന്നെയല്ലേ ദർശനത്തിന് പോകാറ്... അതിൽ സമത്വം ബോധിക്കാത്തവർക്ക് ശബരിമലയിൽ പോയാലും സമത്വം തോന്നാനുള്ള സാദ്ധ്യത കുറവാണ്... ഒരു കാര്യം ഉറപ്പിച്ചു പറയാം.. ശബരിമലയിൽ ദർശനം നടത്തണമെന്ന് വാശി പിടിക്കുന്ന യുവതികൾ ഏതുരീതിയിൽ ചിന്തിച്ചാലും വിശ്വാസികളല്ല... വിശ്വാസികൾ ആയിരുന്നെങ്കിൽ അവർ അയ്യപ്പനെക്കുറിച്ചുള്ള ആകമാനമായ വിശ്വാസ്സങ്ങളെയും മാനിക്കുന്ന നിലപാട് സ്വീകരിക്കുമായിരുന്നു... അങ്ങനെ ഉള്ളവർ യുവതീ പ്രവേശനത്തെ എതിർക്കുന്നവരും ആയിരിക്കും... ഇന്ന് ശബരിമലയിൽ ദർശനം നടത്തണമെന്ന് വാശി പിടിക്കുന്ന യുവതികൾ ക്ഷേത്ര വിശ്വാസ്സങ്ങളെ വെല്ലുവിളിച്ചു ജയിക്കുക എന്ന ഉദ്ദേശം മാത്രം സൂക്ഷിക്കുന്നവരാണ്... ഒരു കാര്യം സംശയലേശമെന്യേ പറയാം... ""ക്ഷേത്രം വിശ്വാസ്സിയുടെ വെളിച്ചവും,, അഭയ കേന്ദ്രവുമാണ്... അവിശ്വാസ്സിയുടെ വിനോദ കേന്ദ്രങ്ങളല്ല""....

     ശബരിമലയിലെ സ്ത്രീ പ്രവേശനം വിശ്വാസ്സികളായ സ്ത്രീകൾ ഒന്നാകെ ആവശ്യപ്പെട്ടതിൽ നിന്നുണ്ടായ ഒരു തീരുമാനമായിരുന്നെങ്കിൽ ആ തീരുമാനം ആഘോഷിക്കുകയും കേരള ചരിത്രത്തിന്റെ തങ്കലിപികളിൽ ആലേഖനം ചെയ്യപ്പെടുന്നതും ആകുമായിരുന്നു... പക്ഷെ അയ്യപ്പനെ ദൈവമായി ആരാധിക്കുന്ന സ്ത്രീ സമൂഹം അയ്യപ്പനുമായി ചേർന്ന് നിലനിൽക്കുന്ന വിശ്വാസ്സങ്ങളെയും ആരാധിക്കാനാണ് ഇഷ്ടപ്പെടുന്നത്... അതിനാലാണ് കേരളത്തിലെ സകല തെരുവുകളിലും അണിനിരക്കുന്ന പതിനായിരങ്ങൾ ഉയർത്തുന്ന ശരണ മന്ത്രങ്ങളിൽ ഭൂരിപക്ഷവും സ്ത്രീ സ്വരത്തിൽ ആയത്...  വിശ്വാസ്സികളായ സ്ത്രീകൾക്ക് എന്തോ വലിയ കാര്യം നേടിത്തന്നു എന്ന ധാരണ ജനിപ്പിച്ചു "വിപ്ലവം അയ്യപ്പന്റെ നെഞ്ചത്തുതന്നെ" എന്ന് കരുതുന്ന തൃപ്തി ദേശായിയെപ്പോലെയുള്ളവർക്ക്‌ ഒപ്പീസ്സ് പാടാൻ പോയ പിണറായി സർക്കാർ വിശ്വാസ്സികളായ സ്ത്രീകളുടെ രോഷത്തിന്റെ ചൂടറിഞ്ഞുകൊണ്ടിരിക്കുകയാണ്.... 

     പുരോഗമന ചിന്തകർ എന്ന് തലയിലെഴുതിക്കെട്ടി നടക്കുന്ന ചിലരുണ്ട്... അവർ ശബരിമലയിലെ സ്ത്രീ പ്രവേശനത്തെ സതിയോടാണ് ഉപമിക്കുന്നത്... അവർ ഒരിക്കലും മറുപടി  അർഹിക്കുന്ന വിഭാഗമേ അല്ല... ക്രിയാത്‌മകമായ ഒരു ചർച്ചക്ക് വിളിച്ചിരുത്താൻ പോലും കൊള്ളരുതാത്ത സാമൂഹിക ഉച്ഛിഷ്ടങ്ങളാണവർ... അതുപോലെ തന്നെയാണ് ഹിന്ദു വിശ്വാസ്സ സമൂഹം ഒന്നായി നിൽക്കുന്നതു കണ്ട് അതിൽ വിള്ളലുണ്ടാകുന്നതിനായി ജാതീയമായ വേർതിരിവിന്റെ മുൻകാല കഥകൾ നിരത്തുന്നവരും.... അവർ തങ്ങളുടെ മുതലെടുപ്പുകൾക്കായി ജാതി വ്യവസ്ഥ എന്നും സമൂഹത്തിൽ ജ്വലിച്ചു തന്നെ നിൽക്കണം എന്ന് ആഗ്രഹിക്കുന്നവരാണ്... ജാതി ചിന്തകൾക്ക് അതീതമായ ഏതൊരു ഒത്തുചേരലിനെയും ഭയക്കുന്ന ഈ വിഭാഗം സമത്വ ചിന്തകൾക്ക് തുരങ്കം വെയ്ക്കുന്നതെന്തെന്ന് നിസ്സാരമായി ചിന്തിച്ചാൽ നമുക്കു മനസ്സിലാകും...

     ശബരിമലയിൽ യുവതീ പ്രവേശനത്തിന്റെ വിലക്കുകൾ നീങ്ങിയ സാഹചര്യത്തെ വിശദീകരിക്കുന്ന ഒരു വാർത്താ സമ്മേളനം കഴിഞ്ഞ ദിവസ്സം മുഖ്യമന്ത്രി നടത്തിയിരുന്നു... അദ്ദേഹം  'യുവതീ പ്രവേശനത്തെ സർക്കാർ പിന്തുണക്കുകയോ എതിർക്കുകയോ ചെയ്യുന്നില്ല.. കോടതി ഉത്തരവിനെ നടപ്പിലാക്കുക മാത്രമാണ് ചെയ്യാൻ ശ്രമിക്കുന്നത്' എന്ന ധ്വനി ഉയർത്തും വിധമാണ് സംസാരിച്ചത്... പ്രായഭേദ്യമെന്യേ സ്ത്രീകൾ ഉൾപ്പടെ നടത്തുന്ന ജനകീയ പ്രതിഷേധത്തെ അദ്ദേഹം ഭയന്നു തുടങ്ങിയോ എന്ന് സംശയിക്കേണ്ടി വരുന്നു... കാരണം വിധിയുടെ ആദ്യ ദിനങ്ങളിൽ ഇടതു സർക്കാരിന്റെ വിപ്ലവ വിജയമായി അവതരിപ്പിക്കാനാണ് അദ്ദേഹത്തിൻറെ പാർട്ടി ശ്രമിച്ചിരുന്നത്... ഇന്നതിൽ നിന്നും അവർ പിറകോട്ടു പോയിരിക്കുന്നു..  നല്ലതുതന്നെ, എന്നാൽ ചില ചോദ്യങ്ങൾ  അവശേഷിക്കുന്നു... വിധിയുടെ വിശദാ൦ശങ്ങൾ മനസ്സിലാക്കുന്നതിനുള്ള സാവകാശം ലഭിക്കുന്നതിന് മുൻപ് തന്നെ അത് നടപ്പിലാക്കുമെന്ന് പ്രഖ്യാപിക്കാനുള്ള തിടുക്കം എന്തിനാണ് അദ്ദേഹം പ്രകടിപ്പിച്ചത്?? റിവ്യൂ ഹർജി നൽകുമെന്ന് പറഞ്ഞ പദ്മകുമാറിനെ എന്തിനാണദ്ദേഹം തിരുത്തിപ്പറഞ്ഞത്?? സ്വയം ഭരണ സ്ഥാപനമായ ദേവസ്വം ബോർഡിന്റെ പുനഃപരിശോധനാ ഹർജി കൊടുക്കാനുള്ള സ്വാതന്ത്ര്യത്തിലേക്ക് കടന്നു കയറിയതെന്തിനാണ്?? വേരിൽ നിന്നും മണ്ണൊലിച്ചു പോകുന്നതിന്റെ തിരിച്ചറിവായി മാത്രമേ വൈകിവന്ന സൗമ്യതയെ നോക്കിക്കാണാൻ കഴിയൂ.... 

     സർക്കാർ കോടതിയിൽ സ്വീകരിച്ച നിലപാടിന് അനുകൂലമായ വിധി നേടിയിട്ട് അതിനെതിരെ പുനഃപരിശോധനാ ഹർജി സാദ്ധ്യമല്ല എന്ന് അദ്ദേഹം പ്രസ്താവിച്ചത് ശരിതന്നെ.. പക്ഷെ സ്ത്രീ പ്രവേശനത്തെ ന്യായീകരിക്കാനായി അദ്ദേഹം ഉയർത്തിയ ന്യായവാദങ്ങൾ ഒരിക്കലും അംഗീകരിക്കാവുന്നതല്ല... മുൻപ് ''രാജകുടുംബത്തിലെ സ്ത്രീകൾ ശബരി മലയിൽ ദർശനം നടത്തിയിട്ടുണ്ട്,, അതിനാൽ യുവതീ പ്രവേശനം തെറ്റല്ല"" എന്ന രീതിയിലാണ് അദ്ദേഹം സംസാരിച്ചത്... എന്നാൽ അദ്ദേഹം ഒരുകാര്യം മനസ്സിലാക്കിയില്ല;; രാജകുടുംബം ചെയ്യുന്നതല്ല വിശ്വാസ്സ സമൂഹത്തിന്റെ പ്രമാണവിധി... അദ്ദേഹം ഒരു പക്ഷെ രാജകുടുംബം ചെയ്യുന്നതിനെ മാമൂലായി സ്വീകരിക്കുന്ന ആളാകാം... 

     ശനീശ്വര ക്ഷേത്രത്തിൽ സ്ത്രീ പ്രവേശനത്തെ അനുവദിച്ചുകൊണ്ട് സുപ്രീം കോടതി പുറപ്പെടുവിച്ച വിധിയെയും,, അത് നടപ്പിലാക്കിയ ബിജെപി സർക്കാരിനെയും അദ്ദേഹം ഉദ്ധരിച്ചു കണ്ടു... മഹാരാഷ്ട്രയിലെ ശനീശ്വര ക്ഷേത്രത്തിൽ എല്ലാ പ്രായത്തിലുള്ള സ്ത്രീകളെയും മുൻപ് പ്രവേശനത്തിൽ നിന്നും വിലക്കിയിരുന്നു... അതുമാത്രമല്ല അവിടെ ക്ഷേത്ര മൂർത്തിയുടെ സങ്കല്പവുമായി സ്ത്രീകളെ പ്രവേശിക്കുന്നതോ, വിലക്കുന്നതോ യാതൊരു ബന്ധവുമില്ലാത്ത കാര്യമാണ്... ശബരി മലയുടെ ആചാര അനുഷ്ഠാനങ്ങളുമായി ഒരു പാട് വേറിട്ട് നിൽക്കുന്നതാണ് അവിടുത്തെ സ്ഥിതി... 

     ഹിന്ദു വിശ്വാസ്സ പ്രമാണങ്ങൾക്കുനേരെ തുടർച്ചയായി പ്രാദേശികമായും അല്ലാതെയും സി പി എം നടത്തി വന്നിരുന്ന അക്രമങ്ങൾക്കും,, അവഹേളനങ്ങൾക്കും എതിരെ സമാജത്തിൽ ആകമാനമായി നിലനിന്നിരുന്ന അമർഷം സ്ഫോടനാത്മകമായി പുറത്തുവന്നത് കൂടിയാണ് ശബരിമല വിഷയത്തിൽ കേരളം കാണുന്നത്... രണ്ടു ദിവസ്സം കൊണ്ട് കെട്ടടങ്ങുന്ന ഒന്നല്ല ഇതെന്ന് ബഹുമാനപ്പെട്ട ദേവസ്വം മന്ത്രിക്ക് ഇപ്പോൾ ബോധ്യപ്പെട്ടിരിക്കും എന്ന് നമുക്ക് വിശ്വസിക്കാം... പ്രതിഷേധത്തിന് നേരെ അടിച്ചമർത്തലെന്ന അവസ്സാന ആയുധവും സർക്കാർ അങ്ങിങ്ങായി പ്രയോഗിച്ചു തുടങ്ങിയതായി മനസ്സിലാക്കാൻ കഴിയുന്നു.. എരിതീയിലേക്ക് വെടിമരുന്നു വാരിയെറിയുന്ന മൗഢ്യതയായിരിക്കും അതെന്ന് തിരിച്ചറിഞ്ഞാൽ നന്ന്...

     വിധി പ്രസ്താവിച്ചത് സുപ്രീം കോടതി ആണെങ്കിലും കേരള രാഷ്ട്രീയ- സാമൂഹിക രംഗങ്ങളിലെ തലവര മാറ്റിക്കുറിക്കാൻ ആ വിധി കാരണമാകും... ഹിന്ദു സമൂഹം ജാതി- രാഷ്ട്രീയ ചിന്തകൾക്ക് അതീതമായി ഒരു പൊതു വിഷയത്തിന്റെ പേരിൽ ഒന്നിച്ചാൽ ഇവിടെ ഒന്നും സംഭവിക്കില്ല എന്ന് വരുത്തിത്തീർക്കേണ്ട പെടാപ്പാടാണ് കേരളം ഭരിക്കുന്ന ഇടതു സർക്കാരിനുള്ളത്... ഭരണഘടന അനുവദിച്ചു തരുന്ന ആരാധനാ- വിശ്വാസ്സ സ്വാതന്ത്ര്യത്തിനുമേൽ കടന്നുകയറാൻ ആരേയും അനുവദിക്കില്ല എന്ന് തെളിയിക്കേണ്ട ബാദ്ധ്യത വിശ്വാസ്സ സമൂഹത്തിനുമുണ്ട്... ആ കരുത്ത് തെളിയിക്കുന്നതിലാണ് വിശ്വാസ്സ സമൂഹത്തിന്റെ ഭാവി നിലനിൽക്കുന്നതും...

സ്വാമിയേ ശരണമയ്യപ്പാ....

[Rajesh Puliyanethu
 Advocate, Haripad]