ഉണർന്നെഴുനേറ്റപ്പോഴാണ് സ്ഥലകാലബോധം ഉണ്ടായത്...i
അയാൾ ചുറ്റും നോക്കി...!
അതെ,, തന്റെ മുറി തന്നെ....
തലേ ദിവസരാത്രി സംഭവങ്ങൾ തീരേ വ്യക്തമല്ലാത്തതിനാൽ അല്പം സംഭ്രമത്തോടും, ജാള്യതയോടും അയാൾ എഴുന്നേറ്റു....
ചുറ്റുവട്ട കാഴ്ചകൾ ഒന്നു വീക്ഷിച്ച് രണ്ടും കല്പിച്ച് അയാൾ വിളിച്ചു....
മീരേ,, ചായ എടുക്കടീ....
പത്തു മിനിറ്റ് സമയം പോലും വേണ്ടി വന്നില്ല,, മീര ചായയുമായെത്തി....
സഹദേവൻ തന്റെ ഭാര്യയെ അടിമുടി ഒന്നു നോക്കി....
അവളുടെ കണ്ണുകൾ കരഞ്ഞു കലങ്ങിയിരിക്കുന്നു.... കവിളിലെ തിണിപ്പ്... ഈശ്വരാ,, അത് ഞാൻ ദേഷ്യത്തിൽ.... ഞങ്ങളുടെ പ്രണയകാലങ്ങളിൽ എത്രയോ ആർദ്രതയോടെ അവളുടെ കവിളുകളിൽ ഞാൻ തലോടിയിട്ടുണ്ട്... അയാൾ
കുറ്റബോധം കൊണ്ട് സ്വയം ഇല്ലാതാകുന്നതായി തോന്നി....
മീരേ,, നിന്നെ ഞാൻ... തലേ ദിവസത്തെ ഓർമ്മകൾ ചില്ലു വെളിച്ചം വീശി അയാളിലേക്കെത്തിത്തുടങ്ങി....
സാരമില്ലേട്ടാ,,, മോടെ ഫീസിന്നു കെട്ടണം.. അല്ലങ്കിൽ അവളെ ക്ലാസ്സിൽ നിന്നിറക്കിവിടും... എന്തോ പറയാൻ വേണ്ടി അത്രയും പറഞ്ഞ് വേദന അമർത്തി അവൾ മുറിയിൽ നിന്നിറങ്ങിപ്പോയി....
കുറ്റബോധത്താൽ യാന്ത്രികമായി പ്രഭാത ചര്യകൾ പൂർത്തിയാക്കി അയാൾ ഇറങ്ങി... തന്റെ കടയിൽ ജോലിക്കാരും,, കസ്റ്റമേഴ്സ്സും വരുമ്പോഴും അയാൾ അസ്വസ്ഥനായിരുന്നു....
മദ്യപാനം തന്റെ സമ്പത്തിനേയും,, കുടുംബ ജീവിതത്തിനേയും,, സൽപ്പേരിനേയും ബാധിക്കുന്നതോർത്ത് അയാൾ വിവശനായി...
മദ്യപാനം എന്ന ദു:ശീലത്തെ ഓർത്ത് അയാൾ വേദനിച്ചു... തന്റെ ജീവിത വളർച്ചയെ ഒരു പത്തു വർഷമെങ്കിലും ഈ ദു:ശീലം പിന്നോട്ട് നടത്തിയിട്ടുണ്ട്.... എന്തെങ്കിലും രോഗം പിടിപെട്ടാലോ,, സഹായിക്കാൻ പോലും ആരും ഉണ്ടാകില്ല... സമ്മർദ്ദം നെഞ്ചു പൊട്ടിക്കുന്ന അവസ്ഥയിലെത്തിയപ്പോൾ അയാൾ ഒരു ദൃഢപ്രതിജ്ഞ എടുത്തു....
''ഇനി ഒരിക്കലും മദ്യപിക്കുകയേ ഇല്ല..''
കടയിൽ കസ്റ്റമേഴ്സ് വന്നു പോകുമ്പോഴും സഹദേവൻ ചിന്തിച്ചു കൊണ്ടിരുന്നത് തനിക്ക് മദ്യപാന സ്വഭാവം കൊണ്ട് സംഭവിച്ച ദൂഷ്യങ്ങളെക്കുറിച്ചായിരുന്നു... ഈ അവസ്സരത്തിലെങ്കിലും അതിൽ നിന്നും മോചിതനായതിലും,, മദ്യപാനം ഉപേക്ഷിക്കാൻ എടുത്ത തീരുമാനത്തിലും അയാൾക്ക് ആത്മാഭിമാനം തോന്നി...
അയാൾ ഫോൺ എടുത്ത് ഭാര്യയെ വിളിച്ചു... എടീ,, ഞാൻ വൈകിട്ട് നേരത്തേവരും... നമുക്കൊരു സിനിമക്ക് പോകാം... ഞാൻ ചില തീരുമാനങ്ങളൊക്കെ എടുത്തിട്ടുണ്ട്... നിനക്ക് സന്തോഷമാകും... വന്നിട്ടു പറയാം...
സമയം മുന്നോട്ട് പൊയ്ക്കൊണ്ടിരുന്നു... വൈകുന്തോറും മദ്യത്തെ ശരീരവും,, മനസ്സും ആകർഷിച്ചു തുടങ്ങിയിരുന്നു... ''ഞാൻ വേണ്ടാന്നു വെച്ചാൽ വേണ്ടാ...,, സഹദേവൻ ഒരു തീരുമാനമെടുത്താൽ എടുത്തതാ'' അയാൾ തന്റെ മനസ്സിനെത്തന്നെ വെല്ലുവിളിച്ചു...
സഹദേവൻ നേരത്തേ കടയിൽ നിന്നിറങ്ങി കാറിൽ കയറി വീട്ടിലേക്ക് തിരിച്ചു... തന്റെ പതിവു സ്ഥലമായ അനാമികാ ബാറിന്റെ മുൻപിൽ എത്തിയപ്പോൾ വണ്ടി നിർത്തി അയാൾ ബാറിലേക്ക് നോക്കിയിരുന്നു.... മനസ്സിൽ ശരി തെറ്റുകളുടെ ലോകമഹായുദ്ധം നടക്കുകയാണ്... ഒടുവിൽ സമാധാനത്തിന്റെ ദൂതുമായി ഒരു ചിന്ത ഉള്ളിൽ പിറന്നു...
ഇന്നു കൂടി അടിക്കാം...
അയാൾ കാർ പാർക്ക് ചെയ്ത് ബാറിലേക്ക് കടന്നു... ചിന്തകൾ ന്യായീകരണത്തിന്റെ ചെറിയ പൊട്ടുകൾ തിരയുകയായിരുന്നു... ഇത്രയും നാൾ ഉണ്ടായിരുന്ന ശീലമല്ലെ!? ഒരു ദിവസം നിർത്താൻ വേണ്ടിയും അടിക്കണ്ടേ...??
കൗണ്ടറിൽ ചെന്നു നിന്ന് അയാൾ വിളിച്ചു പറഞ്ഞു... 'രാമൂ,, രണ്ട് Ninety, ഒരു സോസാ...'
തീരുമാനവും,, പ്രവർത്തിയും സന്ധിക്കാത്ത ഒരു മനുഷ്യന്റെ ദിവസം അവിടെ അവസാനിച്ചു... പകരം ഒരു മദ്യപാനിയുടെ ദിവസം ആരംഭിച്ചു....
[Rajesh Puliyanethu
Advocate, Haripad]
